Irakurle Taldeak Memoria historikoa landuko du uztailean
Garbiñe Ubedaren 'Hobe isilik' liburua aztertuko dute uztailaren 27an, 17:30ean, Igartzako jauregian.
Irakurle taldeak gizarte gaiak landu, hausnartu eta eztabaidatzeko tresna oso indartsuak direla sinetsita, urtean zehar, literatura tarteko, asko dira eta oso anitzak Beasaingo Irakurle Taldeak tertulietarako proposatzen dituen gaiak. Irakurle Taldeak hileroko formatuari heldu zionetik urtero-urtero uztaileko hilabetea memoria historikoari eskaintzen dio. Uztailaren 27an Beasainen egiten den omen-oroimen-ekitaldia indartze aldera, ekitaldiaren aurretik egiten dute irakurritako liburuaren inguruko tertulia. 17:30ean izango da solasaldia, Igartzako jauregian.
Aurreko urteetan Sebastian Salaberriaren Neronek botako nizkin, Josu Penadesen Ileak uretan, Kirmen Uriberen Elkarrekin esnatzeko ordu eta Xabier Mendigurenen Alsina liburuak irakurri eta aztertu dituzte. Aurten, berriz, Euskal Idazleen Elkarteko Lehendakaria den Garbiñe Ubedaren Hobe isilik liburua aukeratu dute memoria historikoaren gaia lantzeko. 2013an argitaratutako liburuaren nobela-proiektuak Agustin Zubikarai beka-saria irabazi zuen.
Irakurle Taldeko dinamizatzailea den Irati Goikoetxearen esanetan, «iraganean gertatuak ezagutzea, aztertzea eta memoriaren transmisioari etorkizuneko bideak ardaztea ezinbestekoa da elkarbizitza sendo batean oinarrituriko gizartea eraikitzeko; literaturak ere horretan laguntzen du».
Liburua eskuragai dago dagoeneko Udal Liburutegian. «Irakurritakoa taldean aztertu eta eztabaidatzea oso garrantzitsua» dela azpimarratzen du Irakurle Taldeak, «herritarren arteko harremanak landu eta lanketa kolektibo eta pluralak egiteko».
Goikoetxeak aurreratu duenez, testigantza zuzenen bat ezagutzeko aukera ere izango da uztailaren 27ko saioan.