Txirbil tailla elkarteak bazkideen batzarra deitu du gaurko
Bazkideak deitu dituzte parte hartzera. San Ignazioko eskola zaharretan duten egoitzan izango da. Urtarrilaren 20an hasiko den tailla ikastarorako izen-ematea ere zabaldu dute
Legazpiko Txirbil Tailla elkarteak asanblada orokorra antolatu du gaurko. Taldeak bazkideak deitu ditu parte hartzera. Txirbil elkartearen egoitzan izango da batzarra, eta bi saio antolatu dituzte: lehenengo deialdia 18:00etan izango da, eta bigarrena 18:30etan.
Horrekin batera, urtero antolatzen duten egur tailla ikastaroan izena emateko epea ireki dutela jakinarazi dute. Urtarrilaren 20an hasiko da ikastaroa; atzo ireki zuten izen-ematea, eta urtarrilaren 16ra arte egongo da zabalik. Kultur etxean eman beharko dute izena parte hartu nahi dutenek. Ikastaroa 30 ordukoa izango da; astelehenetan elkartuko dira parte hartzaileak Txirbil elkartearen egoitzan, San Ignazioko eskola zaharretan.
Bi ordutegi izango dituzte aukeran partaideek: 16:00etatik 18:30era, edo 18:30etik 21:00etara. Ikastaroaren kostua 40 eurokoa izango da, eta lehenengo egunean ordaintzea derrigorrezkoa izango dela adierazi du elkarteak.
Javier Arrieta izango da ikastaroko irakaslea. Urtero bezala, aurten ere berak gidatuko ditu egur tailla lantzeko ikastaro saioak. Urtarrilean eta irailean egin ohi dituzte ikastaroak, tailla lanak ikasi nahi dituen edonorentzat, bazkidea izan ala ez.
Arrietak urteak daramatza ikastaroetan irakasle eta gidari lanak egiten. Txirbil elkartea 2001an sortu zen, eta aurretik ere aritu zen irakasle. Taillagile profesionala da.
Inauterietako ikastaroak
Txirbilen ikastaroaz gain, Sustraiak Dantza Taldeak ere inauterietako saioak eskainiko ditu urtarrilaren 8tik aurrera. Azaroaren 27an hasi zituzten saioak eta, beraz, ikastaroari berrekingo diote oraingoan, Gabonetako oporraldiaren ostean. Inauteri igandeko konpartsan parte hartzeko saioak dira, Lapurdiko Inauteriak herri konpartsan, alegia, eta adin guztietako herritarrentzako daude zabalik.
Herritarrak parte hartzera deitu ditu Sustraiak Dantza taldeak. Dantzariez gain, figuranteak ere behar dituztela eman dute aditzera. Saioak doan dira, asteazkenetan eta larunbatetan, Sustraiak taldeak duen lokalean.
