Stock azokan 30 denda baino gehiago kalera aterako dira gaur eta bihar
Postu batzuk plaza azpian jarriko dituzte, eta besteak denden atarietan. Merkatutako produktuak eskainiko dituzte. Ekintza osagarriak antolatu dituzte: gaur taloak eta bihar eskulan tailerra
Bareak merkatari elkarteko 32 denda kalera aterako dira gaur eta bihar. 10:00etan zabalduko dute stock azoka, eta 13:00ak arte egongo da zabalik. Arratsaldean, 16:30etatik 20:00etara. Bihar, beste horrenbeste.
Merkatutako produktuak eskainiko dituzte, merkatariek beherapenak iragarri baitituzte. Erdi prezioan ere eskainiko dituzte dendan topatu daitezkeen produktu berberak.
Aurtengoa stock azokaren hamargarren edizioa da. Duela hamarkada bat hasi ziren antolatzen, merkatari txikien eta bezeroen arteko distantziak laburtzeko asmoz. Kontsumo ohitura berrien erruz merkataritza txikien egoera ez da nahiko luketena, eta halako ekimenei esker presentzia areagotzen dute. Denda kalera aterata, produktuak ikusgarriagoak dira, eta beherapenek salerosketa bultzatzen dute.
Salerosketa baino gehiago
Bezero gehiago hurbildu daitezen, Bareak merkatari elkarteak ekintza osagarriak prestatu ditu. Gaur, esaterako, Segurako talogileak egongo dira plaza azpian 17:00etatik aurrera mokaduak eskaintzen. Bihar, berriz, haurrei zuzendutako eskulan tailerra egongo da.
Pintxo ibilbidea ere oraindik martxan dago. Basakana, Bodega Riojana, Kuluska, Plazape eta Xerbera tabernak ari dira parte hartzen, bakoitzak bi pintxorekin. Bihar egongo da mokaduak probatzeko aukera, eta datorren astean laugarrena eta azkena. Pintxo onena hautatzeko bozketan parte hartzen duten bezero guztien artean Bareakeko dendetan erabiltzeko hamar euroko hamar bonu zozkatuko dira.
Parte hartuko duten dendak:
· Plaza azpian: Alzuri, Andreak, Argi, Bi Love, Fotoetxe, Ipotx, Kilimak, Kux-Kux, Mujika txirrinduak, Pergola, Udaberri eta Xalo.
· Kalean: Alzuaran, Amets, Anitz, Aramburu, Arku, Arnedoko Txokoa, Bereciartu, Cortes, Hazia loradenda, Ipotx, Itoiz, Jauregi optika, Migdala, Mirari mertzeria, Orki, Oskarbi, Pergola, Phuket, Vicuña Sport, Xalo, Yanez eta Y.S. Harriak.
