Koronabirusa: mesederik ez
Elhuyar Fundazioak eskainita, 'Covid 19aren izurria argitzen' bideo sortako atal bana zabalduko du Goierriko Hitzak egunero. Bigarren atalean, zientzia-politiketan eragiteko beharraz hitz egin dute.
Elhuyar Zientziako lantaldeak koronabirusaren inguruko argibideak emateko bederatzi bideo-pilulako sorta bat prestatu du. Atzo zabaldu zuten aurreneko bideoa, eta gaur, bigarren atalean, Ana Galarraga Aiestaran Elhuyarreko kideak komunitate zientifikoa egoera honen aurrean egiten ari den ahalegina eta zientzia-politiketan eragiteko beharra izan ditu hizpide.
Elhuyarren sare sozialetan eta zientzia.eus atarian zabalduko da edukia, eta horrezaz gain, euskarazko 30 hedabide baino gehiagotan ere hedatuko da edukia -tartean Goierriko Hitza-, webgune, telebista eta irrati-emisioen bidez.
Koronabirusak sortu duen egoera berezi honetan, herritarrei euskarazko informazio irizpidedun eta kalitatezkoa ematea ezinbestekoa da Elhuyarren ustez, eta lan horrek hedadura handiagoa izan dezan, euskarazko komunikabideekin elkarlana sendotzeko abagunea aprobetxatu nahi izan du, eduki hori guztion eskura jarriz.
