Pixoihalak atez ate biltzen hasi dira Seguran, Zaldibian eta Itsasondon
Covid-19a dela eta herriguneetan eta etxoletan pixoihalentzako jarri ziren edukiontzi bereziak erretiratzen hasi da Sasieta, eta atez ateko bilketari ekingo dio hiru herri horietan.
Sasieta Mankomunitateak berriz ekin dio Itsasondon, Seguran eta Zaldibian pixoihalen atez ateko bilketari. Sasietak gogorarazi duenez, «pixoihalak kuboarekin batera ondo korapilatutako poltsa itxian atera behar dira. Gaineratiko hondakinak berriz dagokion kubo barruan atera behar dira».
Hori dela eta, gaur, Covid-19a dela eta herriguneetan eta etxoletan pixoihalentzako jarri ziren edukiontzi bereziak erretiratuko dira. Beste ohar bat ere gogorarazi nahi izan du Sasietak: «Maskarak eta eskularruak ez dira kubo horian sartu behar baizik eta kubo grisean».
Konposta doan garbigunean
Bestalde, Kalitatezko konposta zuri esker kanpainaren barruan, konposta doan banatzen ari dira aste honetan Urretxuko, Beasaingo eta Ordiziako garbiguneetan. Bakoitzak bere poltsa eraman beharko du.
