Urdanetan eta Jakintzan karpa bana jarri ditu Udalak
Bi kasuetan eskolako patioan kokatu dira, eta dagoeneko ari dira erabiltzen. Eskola bakoitzeko espaziora egokitu dira karpak, guneak ahalbidetzen duenaren arabera
Urdaneta eskolan jarritako karpa 
Ordiziako Udalak herriko bi ikastetxeetan, Jakintza Ikastolan eta Urdaneta Eskola Publikoan karpa bana jarri ditu, neguaz babestu eta bertan ekintzak egitea ahalbidetuz. Bi kasuetan eskolako patioan kokatu dira, eta dagoeneko ari dira erabiltzen.
Eskola bakoitzeko espaziora egokitu dira karpak, guneak ahalbidetzen duenaren arabera. Hala, Jakintzaren kasuan, karpak 20×10 metroko dimentsioa du, 200 metro karratu babestuz euriaz, haizeaz, eta bestelakoez. Urdanetari dagokionez, bestalde, 25×10 metroko dimentsioa hartzen du karpak, eta 250 metro karratu hartzen ditu.
“Garrantzitsua da Udalak dituen baliabideak herritarren eskura jartzea, eta, batez ere, egungo egoera kontuan hartuz, elkarlana bultzatzea”, zehaztu du Ainhoa Jimenez, Hezkuntza zinegotziak. Eta hala gaineratu du: “osasun krisi honetan garrantzitsua da haurrak erdigunean jartzea, beraien beharrak identifikatzea eta horiei erantzuna ematea. Haurtzaroari modu zuzenean eragin dio pandemiak, eta ikastetxeekin komunikazio zuzena izan dugu sortzen ziren beharrei aurre egiteko”.
Jakintza ikastolan jarri duten karpa
