Etxetik kanpo ere bai
Beasainek huts eta bi menderatu zuen Sestao River. Lau partida daramatzate jarraian galdu gabe, bi garaipen segidan eta zuzeneko igoera fasea jokatzeko borrokan bete betean daude
Beasainek olatu ona harrapatu du: azken hamabi puntuetatik zortzi lortu ditu eta zuzeneko igoera fasea jokatzeko borrokan bete betean dago. Bosgarrenak dira hamaika punturekin, zuzeneko igoera fasea jokatuko lukeen Tolosarekin berdinduta. Jaitsiera faseko postuak lau puntutara dituzte.
| Sailkapena | Puntuak | J.P. | I. P. | B. P. | G. P. | A. G. | K. G. |
| 1. Gernika | 19 | 7 | 6 | 1 | 0 | 20 | 6 |
| 2. Deustu | 12 | 6 | 4 | 0 | 2 | 9 | 5 |
| 3. Tolosa | 11 | 6 | 3 | 2 | 1 | 9 | 2 |
| 4. Santutxu | 11 | 6 | 3 | 2 | 1 | 6 | 5 |
| 5. Beasain | 11 | 6 | 3 | 2 | 1 | 9 | 4 |
| 6. Sestao River | 8 | 6 | 2 | 2 | 2 | 7 | 4 |
| 7. Real “C” | 7 | 5 | 2 | 1 | 2 | 9 | 7 |
| 8. Balmaseda | 5 | 5 | 1 | 2 | 2 | 8 | 8 |
| 9. Urgaitzi | 3 | 7 | 1 | 0 | 6 | 3 | 21 |
| 10. Aurrera | 2 | 6 | 0 | 2 | 4 | 4 | 13 |
| 11. Somorrostro | 2 | 6 | 0 | 2 | 4 | 3 | 12 |
Txuri urdinek garaipen itzela lortu zuten asteburuan, Sestao Riverren aurka. Huts eta bi menderatu zituzten bizkaitarrak. Lafuentek egin zuen lehen gola 15. minutuan, gol ederra: ongi egindako presioari esker Lafuentek berak baloia lapurtu zuen, area barruan bi atzelariri iskin egin, eta eskuinez errematatu zuen. Jose Luis Riveraren mutilek ongi eutsi zioten errentari eta kontraerasoan min egin zieten etxekoei. Eizagirrek hala egin zuen bigarren gola, 74. minutuan. Aizpuruak Beasainen area ertzean baloia berrekuratu zuen eta dotore amaitu zuen lau hiruren aurkako kontraerasoa. Eizagirrek azken hiru partidetan lau gol sartu ditu.
Urrezko garaipena zelai oso zailean. 3 puntu balio itzela dutena #aupabeasain pic.twitter.com/bLyXhKnyXh
— Beasain KE 1905 (@beasainke1905) November 28, 2020
Asteburu honetan etxean jokatuko dute, Gernika liderraren aurka.
