Ekaina, 'mila kolorez' jantzia
Ekainerako kirol eta kultur eskaintza zabala prestatu du Idiazabalgo Udalak, herriko hainbat eragilerekin elkarlanean. Etzi desioen sagarren bilketa egingo dute Zepaiko sagastian.
Idiazabalgo Udalak eta herriko hainbat eragilek eta taldek ekainerako kultur eta kirol egitaraua prestatu dute, ‘Ekaina mila kolore’ lelopean. Dantza, musika, kirola, pintura…hainbat ekintzaz gozatzeko aukera izango dute herritarrek hil honetan.
Zeramika eta pintura erakusketarekin ekin diote egitarauari. Bihar arte egongo da ikusgai zeramika eta pintura taldeak ikasturtean egindako lanen erakusketa, 9:00etatik 12:30era eta 16:30etik 19:00etara. Ostiralean, berriz, ‘Desioen sagarrak’ ekimenerako proposamenak jasoko dituzte Zepaiko sagastian. Bertan aisirako eta bizikidetzarako gune berria sortzeko ideiak bilduko dituzte.
DBHtik gorako gaztetxoentzat BTT bizikleta saioa izango da larunbatean, Kirol Orientazio Zerbitzuak antolatuta, 10:00etan plazatik abiatuta, eta igandean dantza emanaldia eskainiko du Axari dantza taldeak Igarondo pilotalekuan, 12:30ean.
Datorren astetik aurrera, berriz, honako ekintzak egingo dituzte Idiazabalen:
- Ekainak 7: Telelaguntza hitzaldia udaletxeko areto nagusian, 17:30ean, Adinetxe jubilatu elkarteak antolatuta. Izena emateko: 619 24 13 12.
- Ekainak 12: Jubenilen txirrindulari lasterketa. Lineako etapa 15:30ean eta kronoa 17:30ean. Kaleko pintura lehiaketa ere izango da 9:30etik 15:00etara.
- Ekainak 13: Axari dantza taldearen bigarren emanaldia 12:30ean, Igarondo pilotalekuan. San Adrianera erromesaldia ere egingo dute goizean.
- Ekainak 15-18: Pintura lehiaketako partaideen lanen erakusketa udaletxeko areto nagusian, 10:30etik 12:30era eta 16:30etik 19:00etara.
- Ekainak 15: Gereziondo landaketa, Oinherri sareak antolatuta. ‘Amaren intxaurrak’ ikuskizuneko oparia landatuko dute.
- Ekainak 18: Irakurle txokoa Igarondo pilotalekuan 11:00etatik 20:00etara. Igerilekuaren irekiera ere egingo dute hilaren 18an, 11:00etan.
- Ekainak 19: Paintball-a Pilarrenea etxeko zelaian 12 urtetik gorakoentzat, 3 euroan. 15:00etatik 20:00etara izango da.
- Ekainak 22-30: ‘Balio erantzia’ erakusketa. Ekainaren 22an bisita gidatua izango da 18:30ean eta 20:00etan.
- Ekainak 23: Musika eskolako ikasturte amaierako kontzertua Zelaako kiroldegian 18:00etan.
- Ekainak 26: Ibili eta klik ekimena. Plazatik 9:00etan abiatuta eta argazkigintza ardatz hartuta, ibilaldia izango da.
- Ekainak 28: Aldarrikapenez betetako Harrotasun eguna. Meri, Mari eta Lari pailazoen ikuskizuna Igarondo pilotalekuan 18:00etan.
- Ekainak 28-Uztailak 23: udaleku irekiak goizetan, 9:30etik 12:30era.
Udako ikastaroak
Bestalde, hainbat ikastaro ere antolatu dituzte ekainerako. Hilaren 14tik 17ra patin ikastaroa izango da eskolan, adinka banatuta. Partaide bakoitzeko 8 euroko kuota ordaindu beharko da eta izena liburutegian eman behar dute interesa dutenek. Mugikor ikastaroa, berriz, ekainaren 21ean eta 22an izango da Adinetxe jubilatu elkartean, eta 28tik uztailaren 2ra lehen sorospen ikastaroa egingo dute eskolako psikomotrizitate gelan 9:30etik 13:30era, 40 eurotan. Izen ematea liburutegian izango da.
