Harrotasunaren egunean, harrotzekoak eta lotsatzekoak

LGTBI+ Pertsonen Eskubideen Aldeko Nazioarteko Eguna da gaur. Aldarrikapen eguna askorentzat. Lazkaon elkarretaratzea deitu dute iluntzerako. Adierazpen instituzionalak ere onartu dituzte. Idiazabalen, pintaketak agertu dira.

Goierriko Hitza

Goierri

2021/06/28

Ekainaren 28a da gaur, LGTBI+ Pertsonen Eskubideen Aldeko Nazioarteko Eguna. Ohiko adierazpen instituzionalez haratago, bestelako ekintzak ere antolatu dituzte Goierrin. Aldarrikapen eta harrotasun mezuez gain, lotsarazteko modukoak ere badira, ordea. Idiazabalen, esaterako mugimenduaren aurkako pintaketak agertu dira.

Urola Garaiko Udal Elkarteko Berdintasun Batzordeak manifestua onartu du, gaurko egunaren harira. Azken urteetan aurrerapenak izan badira ere, “aurrerapen horiek ez dute ezkutatu behar oraindik aurrera egin behar duguna”, oraindik ere “LGTBI pertsonen aurkako diskriminazio egoerak behin eta berriz” gertatzen baitira. Beharrezkotzat jo dute Tratu Berdintasunaren eta Bereizkeriarik Ezerako Lege Integrala onartzeko prozesuan aurrera egitea. “Azken finean, beharrezkoa da LGTBI pertsonen bizitzak eta eskubideak babesten dituzten lege-esparruak egotea”. Garrantzitsutzat jo dute, halaber, kolektibo horren “errealitatea ezagutzea, hiriko zurrumurru eta legendak harago, egiaztatutako eta kuantifikatutako datuekin”. Era berean, Ezkio-Itsason, Legazpin, Urretxun eta Zumarragan antolatutako ekintzetan parte hartzeko deia egin diete herritarrei.

Beste hainbat udalek ere, tartean Lazkaok, Beasainek eta Ordiziak, Sexu-Askapenaren Nazioarteko Egunarekin bat egin eta adierazpen instituzionalak onartu dituzte. Beasainen, TransZikloan antolatutako ekintzez gain, umeei eta haien familiei zuzendutako Familianitz tailerra egingo dute gaur, 17.00etan, udaletxeko batzar aretoan. Lazkaon, berriz, Talde Feministak deituta, elkarretaratzea egingo dute 19.00etan, plazan. Eta Ordizian, LGTBI harrotasunaren astea antolatu dute datozen egunetarako.

Pintaketak Idiazabalen

Idiazabalgo Udalak sare sozialetan salatu duenez, LGTBI+ mugimenduaren aurkako pintaketak agertu dira, plazan jarrita dagoen karpan. “Berdintasunaren eta aniztasunaren aurkako jarrera hauek ez dute lekurik gure herrian” esanez salatu dute, eta arratsalderako antolatu dituzten ekintzetan parte hartzeko deia egin diete herritarrei. Izal Bai alderdiak ere, ekintza “lotsagarria eta onartezina” dela dio, eta “aniztasunean, errespetuan eta askatasunean” bizitzeko eskubidea aldarrikatu du.

Erlazionatutako edukiaBeasainek LGTBI kolektiboaren aldarrikapenekin bat egin du

Azken elkarrizketak

Azken bideoak

Argitalpen bereziak