Pertsona gorren nazioarteko egunarekin bat egingo dute Ordizian
Ordiziako Udalak eta Gainditzen Tolosaldeako eta Goierriko pertsona gorren elkarteak orain arteko konpromisoa berretsi dute. Larunbaterako ekintza egitarau oparoa antolatu dute.
Ordiziako udalak eta Gainditzen elkarteak konpromisoa berretsi dute. Pertsona gorren nazioarteko eguna da larunbatean, eta Ordizian, bat egingo dute egun hortako aldarriekin, hainbat ekintzen bidez. Batetik, Ordiziako Udalak eta Gainditzen Tolosaldeako eta Goierriko pertsona gorren elkarteak, orain arteko konpromisoa berretsi dute. Adur Ezenarro Ordiziako alkateak prentsaurrean nabarmendu du, Ordiziako Udalaren lehentasuna dela, «herritarren ongizatea bermatzea, eta horiek hobetzeko urratsak ematea». Gainditzen elkartearekin «harremanetan jarraitzen» dutela, eta horregatik, larunbaterako, ekintza desberdinak antolatu dituztela, non herritar guztiek parte hartu ahal izango duten.
Egitaraua
Egun osorako egitaraua antolatu dute Ordizian, larunbaterako. Batetik, zeinu hizkuntza tailerra eta mimo ikuskizuna egingo dituzte, 11:00etan hasita, Plaza Nagusian. Plazan ere, Ordiziako ikastetxeetako haurrek egindako Pertsona gorren komunikaziorako oztopoak marrazkien erakusketa ikusgai egongo da. Azken horren harira, alkateak adierazi du, “garrantzitsua dela eskolekin bat egitea eta txikitatik erakustea batzuentzat badaudela komunikatzerako orduan zailtasunak».
Bestetik, arratsaldean, bi hitzaldi izango dira, 17:30ean hasita, Barrenan. Jose Martin Saezek, Euskadiko haur gorren eskolek eta pertsona gorren elkarteek, zeinu hizkuntzaren epizentro bezala daukaten rola aztertuko du. Santiago Frigolak, berriz, Zeinu hizkuntza katalana, Kataluniako ondare linguistiko eta kulturala izango ditu hizpide. Hitzaldietara joan nahi duenak izena eman behar du, gainditzent-g@hotmail.com epostara idatzita.
Gainera, herriko denden erakusleihoetan pertsona gorren komunikaziorako oztopoen ilustrazioen erakusketa jarriko dute, irailaren 28ra arte.
