Urtea amaitzeko planak gutxitu dira, baina eskaintza handia da oraindik
Txikien aisialdiari begira antolatutako ekitaldi batzuk bertan behera utzi dituzte, pandemiaren eraginez. Lazkaon eta Beasainen Gabon parkeak mantendu dituzte
Beste leku eta arlo askotan bezala, Goierriko haurren aisialdiari zuzendutako agendek kolpe latza jasan dute azken egun hauetan, pandemiaren bilakaeraren eraginez. Ondorioz, urtea amaitzeko eta hurrengoa hasteko planak asko gutxitu zaizkie eskualdeko txikienei.
Hala ere, hainbat proposamen tinko mantendu dituzte herri askotan, eta eskaintza oraindik handia dela esan daiteke. Gaurko eta biharko iragarrita dauden ekitaldien zerrenda begiratzea besterik ez dago; hori bai, toki batzuetan Gabon garai hauetako ohiko aukerarik gabe geratu dira. Legazpin, esaterako, ez dute antolatu urteroko Gabonetako haur parkerik, eta bertan behera utzi dute Korosti dantza taldearen emanaldia, gaur egitekoa zena.
Gabon parkea, ezinbesteko
Baina Gabonetako ekitaldiekin aurrera egitea erabaki dute beste udalerri batzuetan, eta horietako bat Lazkao da. Herenegun eta atzo ez zen giro herriko Joxe Migel Barandiaran kiroldegian, haurren gozamenerako jarrita zegoen jolas parkean. Gaur ere irekiko ditu ateak parkeak, 11:00etatik 13:30era eta 16:30etik 19:30era. Bihar, berriz, Areria aretoan izango da festa giroa, 17:00etatik aurrera eskainiko duten Go!azen 8.0 ikuskizunarekin. Sarrerak agortuta daude.
Beasainen ere izango da Gabonetako parkerik, gaur eta urtarrilaren 3an, hain zuen. Gernika pasealekuko pilotalekuan puzgarriak eta jolasak izango dira 11:00etatik 14:00etara eta 16:00etatik 19:30era. Bihar, berriz, Skate Herria bihurtuko da Beasain, 10.00etatik aurrera pump track pistan ospatuko den festari esker. Skate tailerrak, ikuskizuna eta musika izango dira, besteak beste.
Idiazabalen, bestalde, bertan behera utzi dute gaur eta bihar egitekoa zen Gabon parkea, baina horren ordez, urtarrilaren 5era arte. 10:30etik 14:00etara udaletxeko areto nagusian ikusgai egongo den sorkuntza lanen erakusketa ikusteko aukera izango dute txikiek eta helduek. Herritarrek egindako postal, eskulan, idazlan eta bideo lehiaketako lanak daude ikusgai bertan. Urtarrilaren 5ean egingo dute sari banaketa..
Zaldibian ere eutsi diote Gabonetako egitarauari, eta gaurko 11:00etarako Hala bazan umeentzako ikuskizuna dute iragarrita, Herri Antzokian. Seguran, berriz, ipuin kontaketa saioa egingo dute bihar, 16:30ean, Baratze pilotalekuan, Malen eta itsas izarra izenburuarekin.
Hurrengo astean ere, urte berrian sartuta eta Errege Magoekin, izango dute txikiek zer egin.
