Beti-Bizi elkarteak 'Beasain jaietan' aldizkariaren itzulera iragarri du
Beasainekin lotura duten artikuluak eta argazkiak biltzen hasiak dira. Aurten ehun urte beteko dira lehen alea argitaratu zenetik
'Beasain jaietan' aldizkariaren lehen aleko azala ‘Beasain jaietan’ aldizkaria argitaratuko da aurten. Hala iragarri du Beti-Bizi elkarteko kultura batzordeak. Urtekariaren ekoizleak beraiek dira. Horregatik, herriarekin lotura duten artikuluak eta argazkiak beraiei bidali behar zaizkie, betibizikultura@gmail.com helbidera. Lanak bidaltzeko azken eguna apirilaren 27a izango da. Aldizkaria festetako larunbatean argitaratuko da.
Lehen alea 1922an argitaratu zen, duela mende bat. Halere, ez da ehungarren alea izango aurtengoa. 1936ko gerran eta ondorengo zazpi urteetan, esaterako, ez zen argitaratu. 1974 eta 1978 urte bitarteetan ere, ez. 2020an eta 2021ean, COVID-19agatik festarik izan ez zelako, ere ez zuten alerik kaleratu. Bi urteko “isiltasunaren” ostean, bueltan direla ospatu dute.
