Santa Isabel jaietako lehen asteburua, ekitaldiz gainezka
Gaur eta bihar pintxo lehiaketa egingo dute. Bihar Goiargi abesbatzak kontzertua egingo du. Igandean, arte eta eskulangintza azoka eta haur danborrada egingo dituzte
Igandean haurren danborrada egingo dute. Irudian, 2019ko ekitaldia. // Argazkia: Gotzon Aranburu Zumarragarrek Santa Isabel jaietako lehen asteburua ospatuko dute gaurtik aurrera. Pintxo lehiaketa, dantza libreko txapelketa, mus txapelketa, Goiargiren kontzertua, eskulangintza azoka eta haur danborrada antolatu dira, besteak beste.
Pintxo lehiaketa gaur eta bihar egingo dute: gaur 19:00etatik 21:00etara eta bihar 12:00etatik 14:00etara eta 19:00etatik 21:00etara, lehiaketara aurkeztutako pintxoak dastatu ahal izango dira. Bidezar, Hirukia, Saski, Txanpon, Urzubi, Ziaboga eta Berri tabernek parte hartuko dute. Sari banaketa ekitaldia igandean izango da, 11:15ean, udaletxean.
Bihar, 12:30ean, dantza libreko txapelketa egingo dute Zelai Arizti aretoan. 16:00etan mus txapelketa jokatuko dute Bidezarren, Txoko eta Haizea tabernek antolatuta. 20:00etan bi kontzertu egongo dira: Goiargi abesbatzak mertzedariatar lekaimeen elizan abestuko du eta Ghost Number taldeak Kalebarren plazan joko du.
Haurren eguna, igandean
Igandean, Haurren Eguna ospatuko dute. 10:00etatik 15:00etara arte eta eskulangintza azoka egongo da Zelai Arizti pilotalekuan. 11:00etan Mikel Serrano alkateak agintaritza makila emango dio alkate txikiari eta honek pregoia irakurriko du. Ekitaldi honetan bertso eskolako gaztetxoek parte hartuko dute. Ondoren, Irrintzi taldeko gaztetxoek dantza saioa egingo dute eta haurrentzako tailerrak egongo dira Zelai Arizti parkean.
17:30ean haur danborrada abiatuko da. Horra hor ibilbidea: La Salle-Legazpi ikastetxea, Secundino Esnaola, Urola, Secundino Esnaola, Legazpi, Jai Alai, Zelai Arizti (geldiunea), Legazpi, Iparragirre, Filipinak eta La Salle-Legazpi.
19:30ean musika eskolako ikasleek rock kontzertua egingo dute Clara Larrañaga parkean (udaletxearen atzealdean). Ordu berean, Ganso&Cia taldeak Panoli Kabareta familia osoarentzako ikuskizuna eskainiko du Zalai Arizti parkean. Eguraldi txarra egiten badu, Zelai Arizti aretoan izango da.
Asteburu honetako ekitaldiekin bukatzeko, 20:00etan trikipoteoa egingo dute Joxe Mendizabalekin.
