I.Zubiblok eskalada topaketa ospatu dute Zaldibian
Lehenengo Zubiblok eskalada topaketa izan da gaur zaldibian, Gailurrerantz mendi elkartearen eskaladako silaren eskutik
Zaldibia eskalada zaletuen topaleku izan da gaurkoan. I. Zubiblok eskalada topaketa izan dute zaldibiarrek Gailurrerantz mendi elkartearen eskalada sailaren eskutik. Ez dela lehiaketa azpimarratu dute, elkartu , ondo pasa eta kirolaz gozatzeko topaketa baita. Beraz, ez da saririk izan, opariak zozketatu dira parte-hartzaileen artean. Erreka izan dute “salbatzaile”, izan ere, Aztiriagaberri eta Eskribau etxe-multzoen tarteko harrizko zubian izan da Zubiblok, eskola eta frontoi ondoko aparkalekura sartzeko harrizko zubian.
Goizean gaztetxoen txanda izan da, 12 eta 16 urte bitartekoena. Hauek goizeko 10:00etatik eguerdiko 14:00etara izan dute eskaladaz gozatzeko tartea. 16 urtetik gorakoek, aldiz, 16:30etatik 19:30etara.
Eskaladaz gain jan-edana ere ez da falta izan. Pintxoak eta barra zerbitzua izan baitute, parte-hartzaileek indarrak hartzeko eta ikusleek itzalpean ikuskizunaz gozatzeko.
Topaketa honetan zortzi bide markatuko dituzte kolore bitartez, zailtasun desberdinetakoak eta bakoitza bere ezaugarriekin, 5 mailatik 7b ingurura artekoak. Beraz, bakoitzak bere mailara eskalatzeko aukera izan du.
