Silo bolen plastikoa jasoko dute hurrengo asteartean Legazpin
Urte amaierara arte, hileko hirugarren astearteetan egingo du bilketa Goimenek, Hegialden eta Brinkolan.
Hurrengo asteartean, hilak 20, hasiko da Goimen elkartea silo-bolak egiteko erabiltzen den plastikoaren bilketa egiten Legazpin. Aurrerantzean, hilero egingo du bilketa, hileko hirugarren astearteetan. Hurrengo bilketak, beraz, urriaren 18an, azaroaren 15an eta abenduaren 20an egingo ditu.
Plastikoa bezperan atera beharko dute baserritarrek, Hegialde auzoan plater-tiraketako instalazioen sarrerara, eta Brinkolako zerrategi ondora.
Birziklatzeko arazoak ematen dituztenez, plastikozkoak ez diren sokak ez ateratzea eskatu du Goimenek, ezta plastikozko bidoirik ere. Plastikozko sokak, berriz, silo-bolen plastikoetatik bereiztea eskatu du, hau da, bi multzo egitea. Mineralen zakuak ere atera ahalko dira, baina denak zaku batean sartuta eta muturra sokatxo batez itxita utzi beharko dira.
Argitasun gehiago nahi izanez gero, Goimenen 943 16 12 44 telefonora deitu daiteke.
