Legazpiko sozialistek Laubiden eraikitako drainatze elementu bat kentzeko eskatu dute
Gaur goizean auto istripu bat gertatu da bertan, egitura jarri zutenetik laugarrena.
Gaur goizean Laubiden gertatu den auto istripuaren ondoren, Legazpiko udal talde sozialistak gogoratu du ustez istripuaren eragile izan den drainatze egitura jasangarria kentzeko edo aldatzeko eskatu zuela udan Lurralde Batzordean.
Elementu horrek dagoeneko lau istripu eragin dituela adierazi dute sozialistek, eta lehen bailehen aldatzeko eskatu dute berriz ere. Egitura hori mendiari horizontalean itsatsita egon beharrean, bertikalean egon beharko lukeela diote.
Gaurko istripuan auto bat irauli egin da, eta gidaria zaurituta gertatu da. Gidaria autotik ateratzeko, suhiltzaileen laguntza behar izan da.
