Patxi Zubizarreta idazle ordiziarrak Augustin Zubikarai nobela beka irabazi du
'Gau otsoa' da ordiziarrak aurkeztu duen proposamenaren izenburua, eta insomnioa da lanaren ardatz. Urriaren 27an jasoko du saria, Literatur Amuak jardunaldien barruan, Ondarroan. Ekitaldi berean aurkeztuko da iazko proposamen irabazlearen emaitza: Mikel Alvarez Sarriegi beasaindarrak idatzitako “Euskalia” eleberria.
Patxi Zubizarreta artxiboko irudian. Patxi Zubizarreta idazle ordiziarrak irabazi du Ondarroako Udalak eta Elkar argitaletxeak antolatzen duten Agustin Zubikarai saria. Zortzi lan aurkeztu dira aurtengo deialdira, eta horien artean Zubizarretaren proposamena aukeratu du Leire Bilbaok, Xabier Mendigurenek eta Ana Urkizak osaturiko epaimahaiak. Saria urriaren 27an, Ondarroako Kofradia Zaharrean egingo den Literatur Amuak jardunaldien barruan jasoko du; 6.000 euro eta Elkar argitaletxearekin liburua argitaratzea. Ekitaldi berean aurkeztuko da iazko proposamen irabazlearen emaitza: Mikel Alvarez Sarriegi beasaindarrak idatzitako “Euskalia” eleberria.
Gau otsoa da ordiziarrak aurkeztu duen proposamenaren izenburua, eta insomnioa da lanaren ardatz, gizartean guztiz zabaldutako gaitza eta aldi berean, gizartearen gaitzen erretratua egiteko balio duen sintoma.
Kontakizunean, Adela izango da protagonista, 45 urteko kazetaria,banandua eta ume baten ama. Insomnioari buruzko erreportaje bat egin behar du lan egiten duen aldizkariarentzat, eta hortxe dago eleberriaren abiapuntua, gero hainbat pertsonaia, sare eta abarretan korapilatuko dena. Epaimahaiak nabarmendu du “begirada zorrotz bezain originala gure buruari eta munduari, idazlera gozo bezain aberats batean emana, umorez eta kultur erreferentzia josia”.
