Azaroa Zientziaroak hartuko du Ordizientziak utzitako lekukoa
Ordizientzia bihar bukatuko da, Goierriko mugarrien inguruko hitzaldiarekin. Azaroa Zientziaroa hasiko da segidan, aldaketa genetikoei buruzko hitzaldiarekin.
Lemniskata Zientzia Sare Herrikoiak antolatzen duen Ordizientzia zikloaren aurtengo azken saioa izango da biharkoa. Joseba Alonsok Goierri mugarriz mugarri hitzaldiarekin itxiko du ekitaldia. Barrenan izango da hitzaldia, 19:00etatik aurrera. Hitzaldiaren osagarri bezala, izen bereko erakusketa ikusgai dago Barrenan bertan. Azaroaren 3ra arte egongo da ikusgai.
Zientziaroa, Beasainen
Ordizientziak Azoaroan Zientziaroa zikloari pasako dio lekukoa, Beasainen, azaroan zehar. Lemniskatak antolatzen du hau ere. Ana Maria Zubiagak irekiko du, aldaketa genetikoen inguruko hitzaldiarekin. Igartzako jauregian izango da, azaroaren 4an, ostirala, 19:00etan.
Zientziaroa zikloaren barruan ere Joseba Alonsok mugarrien inguruko hitzaldia eskainiko du. Gainera, Kaierak bildumaren barruan liburu bat osatu du gai horren bueltan eta aurkezpena egingo du. Azaroaren 11an, ostiralean, 19:00etan izango da, Igartzako jauregian. Aipatu ere, Ordiziatik Beasainera ekarriko dutela izen bereko erakusketa. Igartzan egongo da ikusgai, azaroaren 4tik aurrera.
Gainera hainbat ekintzaileren eskutik hitzaldia antolatu dute. Dena den, zein ekintzaile izango diren ez dute iragarri oraindik.
Aurtengo edizioa, Nanoguneko zuzendaria den Jose Mari Pitarterekin itxiko dute.
Zientziaroa zikloaren barruan matematika argazki lehiaketa egingo dute. Bederatzigarren edizioa izango da aurtengoa. Argizpi argazki elkartearekin batera antolatu dute.
