Legorretako gazte festak egitarau bete-betearekin datoz

Bihar hasiko dira festak, 18:30ean, suziriaren jaurtiketarekin. Mus eta kuadrillen herri kirol txapelketak, kontzertuak, garagardo dastaketa eta bertso saioa izango dira, besteak beste

A. Vierbücher

Legorreta

2022/10/27

Gazte Festak ospatuko dituzte Legorretan, Gazte Asanbladak antolatuta, 23.enez. Lau egunetarako egitaraua antolatu dute, ostiraletik hasita, astelehenera artekoa. Ekintzak, herriko plazan jarri duten karpan egingo dituzte.

Ostiralean, 18:30ean hasiko dira festak, suziriaren jaurtiketarekin. Jarraian, buruhandiak izango dira. Gauean, berriz, mus txapelketa izango da, 22:30etik aurrera. Bertan parte hartzeko izena eman behar da, txapelketaren aurretik. Bikoteko 8 euro ordaindu beharko dira.

Larunbata, egun handia

Larunbata izango da Legorretako gazte festetako egun beteena. Eguerdian hasiko da festa, herri bazkarian. Ia 200 lagun elkartuko dira mahaiaren bueltan. Txartel guztiak saldu dituzte dagoeneko. Albisu trikitilariak girotuko bazkal ostea.

Arratsaldean, elektrotxaranga izango da, eta gauean, kontzertuak. Hiru proposamen: Onlifly getariarrak, Tintz DJ zumarragarra eta The Clayton talde aramaioarra izango dira.

Iganderako, bertso saioa antolatu dute. Odei Lopez, German Urteaga, Maddi Aiestaran eta Gorka Maiz izango dira bertsotan, Aizpea Garmendia, berriz, gai jartzen.

Astelehenerako antolatu dituztenen artean, nabarmendu kuadrillen arteko gazte jokuak izango direla. Basabe garagardo dastaketa ere izango da eta gauen kontzertuak. Etxepe musika urbano taldea, Bassagain Soinu Sistema eta Ballon Frame ordiziarrek joko dute.

Gune segurua

Eraso matxisten aurka antolatu eta protokoloa prest du Aiuri Talde Feministak. Festak hasi aurretik, antolakuntzan diharduten eragileek garbi adierazi dute, «ez dela inongo erasorik onartuko».