Lara Odriozolak aurkeztu du 'Ictus' liburua
Gaurtik salgai dago eleberria herriko hainbat puntutan.
Legazpiko Kultur Etxeko aretoa herriko idazle berri baten aurkezpenaren lekuko izan zen atzo iluntzean. Lara Odriozola Garmendiak Ictus eleberria idatzi du, eta atzo aurkeztu zuen herritarren aurrean, Ane Odriozola lehengusuaren laguntzarekin. Anek Gibolako trilogia bezala, Circulo Rojo argitaletxearekin argitaratu du Larak bere lehen liburu hau, eta gaurtik salgai dago Hizkuntza eta Apatxo liburu dendetan, Mimaru lora dendan, Odriozola arrandegian eta Obena harategian, 17 euroan.
Eskandinaviar nobela beltzaren eta thriller psikologikoaren artean kokatzen den estilokoa da Ictus, eta Larak ikasle garaietan ezagutu zuen Estokolmon (Suedia) girotzen da.
Lara “pozik” geratu zen atzoko aurkezpenarekin. “Jende dezente hurbildu zen eta giro polita sortu zen. Hunkigarria eta gertukoa izan zela esan didate”. Aurkezpena Ane lehengusuak egiten zizkion galderei erantzunez egin zuen, eta liburuaren bi lehen paragrafoak irakurri zituen gainera. Bestalde, promozioa egiteko egin duten booktrailerra jarri zuen, eta amaieran, Suediako gailetak dastatu zituzten bertaratukoek.
Goierriko Hitzak elkarrizketa egin dio Lara Odriozolari, eta bihar argitaratuko du papereko edizioan.