Saskibaloiaz gozatzeko egunak
Inoizko parte hartze handienarekin egiten ari dira Gabonetako saskibaloi campusa Beasaingo Antzizar kiroldegian, BKLk antolatuta. Saskibaloia sustatzea da helburua.
Gabonetako saskibaloi campuseko partaideak. Emakumeak ere inoiz baino gehiago dira. Argazkia: Ariane Vierbücher Gabonetako saskibaloi campusa bueltan da Beasainen, BKL saskibaloi klubaren ekimenez. Astelehenean eman zioten hasiera, eta ostegunera arte iraungo du, saskibaloizaleen eta saskibaloia lehenengoz probatu nahi dutenen gozamenerako.
Oskar Rodriguez BKL klubeko kirol zuzendaria, Gabonetako saskibaloi campusaren koordinazio lanetan ere diharduena «gustura baino gusturago» agertu da: «Aurreko urteetako partaide kopurua bikoiztu egin dugu, 66 gaztetxok eman dute izena, eta oso-oso pozik gaude izandako harrerarekin».
Badira urte batzuk saskibaloi campusa egiten dutela Gabonetan Beasainen, eta hasiera-hasierako helburuei eusten diete. Rodriguezek adierazi duenez «etxeko txikienentzat opor garaia den honetan, aisialdi eskaintza erakargarri bat izatea da gure nahia, eta BKL-k eskaini diezaieken onena da, ondoen egiten dakiguna eta gustukoen dugun kirola praktikatzen denbora pasatzeko aukera eskaintzea, zer hoberik?», dio Rodriguezek saskibaloi zaletu amorratua dela agerian utziz.
Campuseko partaideen artean, asko, BKL klubeko jokalariak dira. Lehendik ere saskibaloian aritzen diren horiekin «urtean zehar landu ezin ditzakegun teknikak eta estrategiak lantzeko aprobetxatzen dugu egunotan, modu erakargarrian beti ere, batez ere, era ludikoan».
Saskibaloian sekula jokatu ez duenik ere ari da parte hartzen campusean, adinean txikienak dira, batik bat. «Ezin dugu ulertu saskibaloia probatu ez duenak nola esan dezakeen ez duela gustuko, eta campus hau, horiek guztientzat ere zuzenduta dago, izan ere, saskibaloia sustatzea ere bada gure helburua», borobildu du Rodriguezek.Txikienak saskibaloira gerturatzea ere bada campusaren helburua.
Aurtengoa ia martxan dago, baina datorren urtean ere ziur antolatuko dutela eta aurten zalantza izan duten guztiei animatzeko deia egin die Rodriguezek.
3×3 txapelketa
Atzoko eguna, saskibaloiari eskainia izan zen, izan ere, arratsaldean, 3×3 saskibaloi txapelketa jokatu zuten. 32 taldek parte hartu zuten, eta partaide guztiak izan ziren irabazle, denei banatu baitzieten domina bana.
