Musika-abentura ahaztezina bizi dute Doinuako ikasleek Eurodisneyn
Disney Performing Arts programan parte hartzeko hautatuak izan ziren Legazpiko musikari gazteak, eta kontzertua egin dute asteburuan Parisko parke tematikoan.
Igande goizean iritsi ziren etxera Doinuako ikasleak, Eurodisneyn musika-abentura ahaztezina bizi eta gero. Disney Performing Arts programan parte hartzeko hautatuak izan ziren Legazpiko musikari gazteak, eta larunbat eguerdian Parisko parke tematikoko areto batean kontzertua egiteko aukera izan dute. Parkeaz gozatzeko denbora ere izan dute.
Guztira 67 ikasle joan dira Eurodisneyra –68 ziren joateko, baina azken orduan batek ezin izan zuen–, bost irakaslez eta hiru gurasoz lagunduta. Musikariak Doinuako Banda Txikiko, Gazte Bandako eta Fanfarreko kideak ziren, 9 eta 20 urte bitartekoak. Guztien artean osatutako banda handiaren zuzendaria Leire Narbaiza izan da.
Luxuzko esperientzia
Herrira itzuli eta biharamunean, eztarria urratuta duela egin du asteburuko balorazioa Narbaizak. “Oso nekatuta gaude, oso intentsua izan da guztia. Oso ondo pasatu dute ikasleek, oso esperientzia polita bizi dute, baita irakasleok eta begiraleok ere”.
Kontzertua “orain arte eman duten onenetakoa” izan dela nabarmendu du banda handi horretako zuzendariak, hasieran urduritasuna nabaria bazen ere, eta eskertu egin du han izan dituzten bitartekoak, “agertokia oso handia zen, soinu eta argi teknikariak ari ziren guretako lanean, agertoki zuzendari bat ere bagenuen… Horrelako esperientzia handia bizitzeko izan duten aukeraz jabetzeko esan diet ikasleei, oso handia izan da dena, luxuzkoa”.
Musikaz aparte, bidaia ere zoragarria izan dela esan du Narbaizak, eta ikasleek ondo aprobetxatu dituztela han egindako egunak, “asko disfrutatu dute parkean, atrakzioetan ibili dira, ikuskizunak ikusi dituzte, opariak erosi dituzte etxekoentzat…”.
Eurodisneyko abentura amaituta, orain etorkizunari begira jarrita daude, eta errepertorio berria prestatzen hasiko dira laster, besteak beste Santikutz jaietako emanaldiari begira. Eta hortik aurrera, “bide eta erronka berriak bilatzen” hasiko dira.
Doinuako ikasleen musika-abentura honek oihartzun handia izan du, eta besteak beste, ETB-1eko Biba Zuek saioan eta ETB-2 Teleberri albistegian agertu da.
Kontzertua bera Instagram bidez eman zuten zuzenean Doinuakoek, eta oraindik ikusgai dago @doinuamusikaeskola 1 kontuan.
