Beasaingo Udalak emakumeen etxea sortzeko konpromisoa hartu du
Beasaingo Udalak emakumeen etxea sortzeko prozesu parte hartzailearekin hasteko konpromisoa hartu du gaur, Emakumeen nazioarteko egunaren harira eguerdian egindako elkarretaratzean. Denera, zazpi ardura hartu ditu udalak.
Asmubeko ordezkariak, manifestua irakurtzen, atzean ordezkari politikoak dituela / K. G. Z. - Goierri Hitza Beasaingo Udalak emakumeen etxea sortzeko prozesu parte hartzailearekin hasteko konpromisoa hartu du gaur, Emakumeen nazioarteko egunaren harira eguerdian egindako elkarretaratzean. Denera, zazpi ardura hartu ditu udalak:
1. |
Emakumeen lidergoa bultzatzea eta boterea berdintasunean egikaritzeko baldintzak erraztea. Eta estamentu publiko eta pribatu guztietan emakumeen ahalduntzea eta parte hartzea sustatzen duten politikak indartzea. |
2. |
Emakumeen etxeak sortzeko prozesu parte hartzeileekin hastea eta ahalduntze eskolak baliabide egokiekin hornitzea. |
3. |
Mugimendu feministaren eta emakume-elkarteen parte-hartzea indartzea berdintasun kontseiluan. |
4. |
Berdintasun-planean jasotako ekintzak garatzen jarraitzea. Era berean, planaren intersekzionalitatea indartzea gure gizartea osatzen duten eremu guztietan, emakumeek beraien aniztasunean duten parte-hartze osoa eta eraginkorra finkatzera iristeko |
5. |
Adinaren eta generoaren arabera bereizitako datuak sortzea. |
6. |
Politikan sartzen diren emakumeentzako ahalduntze guneak sortzea. |
7. |
EUDELi eskatzea, indarkeria politikoari aurre egiteko protokoloak proposa ditzala, emakumeen partea hartzeari eta erabakitzeko gaitasunari buruzko ikerketa bultza dezala eta ordezkaritza orekatu baterantz egiten diren aurrerapenak babes ditzala. |
Beasainen ordezkaritza duten hiru alderdietako eta udaleko ordezkariek irakurri dute manifestua. Esan dute gizarte, ekonomia, ingurumen eta gobernantza ereduak birplanteatu behar direla, “berdintasun-arrakalak gutxitzeko”. Izan ere, arrakalak geroz eta handiagoak direla azpimarratu dute eta, bereziki, emakumeentzat.
“Orain da liderrak izateko garaia”, azpimarratu dute, “erakundeak eta gizartea eraldatzeko harreman-eredu askoz ere inklusiboagoak, kooperatiboagoak eta sortzaileagoak lortzeko. Sektore anitzeko lankidetzako gobernantza feministaren eredu baterantz aurrera egin behar da, elkar entzutean oinarrituz, baita botere eta erantzukizunen banaketa eta partaidetza-prozesuak abian jartzean ere”.
Bizitzari baldintza duin eta justuetan eusteko apustua egiteko unea dela gehitu dute. “Diskurtso hutsaletatik, elkarlanerako eta sistema publikoaren defentsarako bideak ezarri eta eraikitzeko garaia da”. Horretarako, politika feministak eta emakumeen parte hartzea aldarrikatu dituzte. Emakumeen parte hartzea bermatzeko zaintza-lanen banaketa parekidea, lan baldintza hobeak, estereotipo eta aurreiritziak kentzea, emakumeen aurkako indarkeria desagertaraztea eta lidergoan jarduteko praktikak eta moduak deseraikitzea beharrezkoa dela esan dute.
Amaiera, kantuan
Asmube elkarteko literatura saileko ordezkarik hartu dute hitza ondoren. Frida Kahlori eta emakumeari buruzko bi pieza irakurri dituzte. Amaitzeko, Mikel Markezen Konplize ditut eta abestia abestu dute, denek elkarrekin. 50 bat lagun elkartu dira, asko eta asko ikur moreak soinean jantzita.
