Aita Iparragirreko mendi taldeak orientazio saio arrakastatsua egin du
Idiazabalgo Aita Iparragirre Herri Eskolako Mendi Taldearen orientazio saioan ia ehun lagun elkartu dira
Idiazabalgo Aita Iparragirre mendi taldekoak orientazio saioan, Anttonio Berasategirekin (erdian) 
Apirilaren 23an mendi-irteera berezia egin zuen Idiazabalgo Aita Iparragirre Herri Eskolako Mendi Taldeak. Ume eta guraso, 90 bat lagun elkartu ziren mendian zeharreko orientazio jolasean parte hartzeko. Atxurbide/Irumugaeta mugetan dagoen Arantzazumendi paraje, inguru ederrean ibili ziren batetik bestera. Anttonio Berasategi maisuaren gidaritzapean, mapak eta iparorratza eskuetan, ume zein guraso, taldeka, gozatu ederra hartu zuten. Jolasaren ondoren, indarrak berritu asmoz, bertatik bertara, Txarazabaleko bordara gerturatu ziren Santos Irastorzak goxo prestatutako hamaiketakoaz gozatzera. Inguruko zoko eta bazterrak, kukuaren konpainian, bizi eta sentituz, egun ahaztezina, egun zoragarria pasa zuten. Goiza borobiltzen lagundu zuten Anttonio eta Santos eskertu nahi ditu mendi taldeak beren prestutasunagatik. Hurrengo irteera, ikasturteko azkena, bi gau pasatuz, Bardeetara egingo dute maiatzeko azken asteburuan.
