Segurako Aste Santuko lantaldearen eskertza
Segura Aste Santuko prozesioen antolakuntza batzordea. // Argazkia: Loinaz Agirre Segurako Aste Santuko ekintzak antolatzen dabilen lan taldeak, aurtengo ekimenetan eta azken urte guzti hauetan laguntzen eta parte hartzen aritu diren herritar guztien beren esker ona adierazi nahi diete. Hauxe da prentsari bidalitako oharra:
“Dakizuen bezala, Aste Santuaren inguruan dagoen lan guztia antolatzeko lan talde bat sortu dugu, horrela bada, aurretik daudenei lagunduz lanak konpartitu eta antolaketa indarberritzen ari gara.
Gure aurrekoei esker, 300 urte baino gehiago dituen tradizio honek bizirik jarraitzen du eta publikoki eskerrak eman nahi dizkizuegu urte askotan Aste Santuaren inguruan lanean zabiltzaten guztioi, isileko lan asko egiten duzue eta benetan eskertu nahi dizuegu idatzi xume honen bidez. Ezin ditugu ahaztu azken urteetan hil direnak eta etenik gabe lan ezberdinetan ibiltzen zirenak.
Eskerrik asko aurrera eramateko parte hartu duzuen guztioi: txukunketa lanak, arropak, garbiketa, apainketa, prozesioko egunetan atera zareten santu-eramaile, monagilo, soldadu erromatar, nazareno, penitente, aingeru, San Migel, txistulariak, korua, herritarrak eta abar luze bat.
Orokorrean parte hartzea oso zabala eta positiboa izan da, batez ere, gazteena azpimarratu nahiko genuke.
Beraz, mila-mila esker eta segi ondo!
Aste Santua taldea”.
