Ostiralera arte dago zabalik Xabier Ortiz de Luzuriagaren omenezko BTT trabesiarako aurretiko izen-ematea
Ekainaren 4an izango da aurten, eta 35 kilometroko eta 1.300 metroko desnibela izango du ibilbideak. Probaren 18. edizioa da.
Iazko edizioko antolakuntzako kideak. ARGAZKIA: Mikel Bravo Azken urteetan bezala, Hegialdeko jaien atarian egingo da aurten ere Xabier Ortiz de Luzuriagaren omenezko mendi bizikleta ibilaldia, ekainaren 4an, hain zuzen ere. Antolatzaileek irekita dute aurrez izena emateko epea, eta ostirala, hilaren 26a, izango da azken eguna. On line egin behar da izen-ematea, 12 euro ordainduta. Egunean bertan ere izango da aukera, baina orduan 15 euro ordaindu beharko da.
Aurtengo probarena 18. edizioa da, eta 35 kilometroko eta 1.300 metroko desnibela izango du Legazpiko mendietan zehar prestatutako ibilbideak. Irteera, ohi bezala, Laubideko kale nagusitik egingo dute, 09:15ean.
