Ataun 2-1ekoa alde duela joango da Altzora, etzi, Herriartekoan
Finalaurrekoetara sailkatzeko nahikoa du Altzori partida bat irabaztea eta beste bietako batean sei tanto egitea. Zumarragak Astigarragan jokatu beharko du itzulikoa, paleta gomaz. Belokin hiru partidetatik bakarra irabazi zuten, eta zail dute kanporaketa gainditzea.
Ataungo Herriarteko txapelketako 2023ko taldea. Ataun Kirol Elkarteko pilotari taldeak Altzon jokatuko du, larunbatean, Gipuzkoako Herriarteko pilota txapelketako final-laurdenetako itzuliko jardunaldia. Lehengo zapatuan, Auzoetan, kanporaketa aldeko jarri zuten ataundarrek, orokorrean 2 eta 1 irabazita. Finalaurrekoetara sailkatzeko nahikoa du Altzori partida bat irabaztea eta beste bietako batean sei tanto egitea.
Desorekatuak suertatu ziren erabat Ataunen jokatutako hiru partidak. Kadeteetan, 0-22 galdu zuen Ataungo Altzua-Dorronsoro bikoteak. Jubeniletan iritsi zen ordaina, Erauskin-Zubizarretak 22-0 irabazi baitzieten altzoarrei. Hirugarren neurketan, nagusiena, Etxeberria-Senar ere airoso atera ziren, 22-5eko markagailuarekin balantza etxerako utzita.
Joaneko jardunaldia, Altzoko Altzomuino frontoian, larunbatean 11:00etan hasiko da.
Zumarraga Astigarragan
Herriartekoan bizirik geratzen den Goierriko beste ordezkaria Zumarraga da, paleta gomaz.
Final-laurdenetan, joanekoa Astigarragan jokatuko dute, igandean 11:00etan. Lehengo ostiralean, Beloki frontoian, 1-2 aurretik jarri ziren astigartarrak.
