Zaldibiako plazaren diseinurako ikasleek azken egonaldia gaur hasiko dute
Udalak harrera egingo die EHUko eta Innsbruckeko (Austria) unibertsitateko arkitektura ikasleei, gaur 20:00etan. Ekainaren 23ra arte, plazarako proposamena bukatu eta jendaurrean aurkeztuko dute. Bertan kanpatuta egongo dira.
Zaldibiako plaza berritzeko eta diseinatzeko Ertzetik erdira prozesua ari da bukaerara iristen: definizioarenera. EHUko eta Innsbruckeko Unibertsitateko arkitektura ikasleek prestaturiko proposamena ezagutzea izango da orain datorren urratsa.
Arkitektogaiak ari dira Zaldibiara iristeen, bigarren egonaldia egiteko. Gaur, 20:00etan, udaleko jarduneko ordezkariek 20:00etan harrera ofiziala egingo diete. Ekainaren 23ra arte landuko dute azken fasea, «parte hartzearen bidez jasotako ideia, asmo eta proposamenak gorpuzteko eta plazaratzeko», udalak aurreratu duenez.
Udaletxeko beheko aretoan lan egingo dute ikasleek, eta han edukiko dute “herri espazio komunen eraikuntzarako arkitektura lantegia”. Kanpalekua, berriz, Olakoerrotako zelaian jarri dute, eta kanpin-dendetan lo egingo dute; Luberriko gimnasioa erabiliko dute, oinarrizko azpiegitura modura.
Utopien plazaratzea izeneko egonaldian, azken diseinu lanak egiteaz gain, zenbait aisialdi-jarduera ere antolatu dituzte.
Aurkezpena, hilaren 23an
Unibertsitate ikasleek Gaztelura mendi irteera izango dute, ostegun arratsean 18:00etan, eta ogitartekoekin afalduko dute gero. Ostiralean pintxo-potera irtengo dira. Hurrengo asteartean, azkenik, ekainaren 20an, herri afaria eta Zinema gaua dituzte.
Egonaldiari eta prozesuari bukaera ekainaren 23an emango diete. Plaza berriarentzat ondutako diseinu-proposamena jendaurrean aurkeztuko dute, udaletxeko herri aretoan, 17:00etan. Erakusketa batean erakutsiko dituzte plazarako sortu dituzten osagaiak, proposamenak eta eremuak.
Hirugarren topaketa dute arkitektura ikasleek Zaldibiako herritarrekin. Orain hurrena, iazko azaroan jaso zituzten herritarren nahiak eta ideiak. Otsailean, «utopia konkretuekin» itzuli ziren austriarrak, topaketa batean gehiago zehazteko. Zazpi lan eremu garatu dituzte geroztik.
Zaldibiako plaza./Aimar Maiz
