Gaur landatu dituzte Legazpi loratzen egitasmoko margaritak
GizarteLab proiektuak bultzatutako belaunaldi arteko eskulan tailerretan egin dituzte herriko hainbat taldek, aurreko asteetan.
Legazpiko sarreretako bateko biribilgunean landatu dituzte lore batzuk. ARGAZKIAK: Asun Ugarte Legazpiko lau biribilguneetan, udaletxe atzealdeko lorategietan eta Gizarte Zentroko kanpoko loreontzietan koloredun margarita bereziak daude landatuta gaur goizetik. GizarteLab proiektuaren barruan Gizarte Zentroan azken asteotan egin diren eskulan ikastaroetan belaunaldi desberdinetako hainbat legazpiarrek egindakoak dira, koloredun plastikozko botilak erabilita.
Gaur goizean landatu dituzte Haztegi ikastolako, Domingo Agirreko eta Olazabal institutuko ikasleek, eta Eguneko Zentroko erabiltzaileek. Loreak egiten Nagusilan, Buztintegi eta Iratzarri elkarteko kideek ere jardun dute, baita Garaguneko erabiltzaileek ere.
