Saskibaloia, Legazpiko gaztetxoentzako Gabonetarako kirol proposamena
Andraitz klubak saskibaloi campusa antolatu du hilaren 26, 27, 28 eta 29rako. Parte hartzeko izena eman behar da hilaren 17rako. Igande honetan saskibaloi eskolen topaketa egingo dute Domingo Agirreko kantxan.
Legazpiko Andraitz klubeko saskibaloi eskolako taldea. ARGAZKIA: Andraitz Andraitz kirol elkarteak antolatuta, saskibaloi campusa egingo da Legazpin Gabonetako oporretan. Hilaren 26an, 27an, 28an eta 29an izango da campusa, eta Bikuña kiroldegian egingo da, 09:30etik 12:30era. Prezioa 45 eurokoa da, eta izena emateko epea irekita dago, hilaren 18ra arte, andraitz@gmail.com helbidean. 2008tik 2015era bitartean jaiotako haurrei eta gaztetxoei dago zuzenduta.
Andraitzen campusaren antolatzaileek «dibertimendua, trebetasunen garapena eta parte hartzaileen adinaren araberako egokitzapena» ardatz dituen egitaraua prestatu dute Gabonetako lau egun horietarako. Partaideek «saskibaloian ikasi, eta jolastuz gozatzea» espero dute prestatu duten jarduera multzoarekin.
Adinaren arabera antolatuko dituzte partaideen taldeak: 2014 eta 2015ean jaiotako benjaminak, 2012an eta 2013an jaiotako kimuak, 2010ean eta 2011n jaiotako haur mailakoak, eta 2008an eta 2009an jaiotako kadeteak.
Jarduerak, berriz, era askotakoak izango dira. Lehenengo egunean, saskibaloiaren oinarriak eta sarrera jokoak ikasteko saioak egingo dituzte kirolari gazteek. Bigarren egunean, talde trebetasunak eta jokoak landuko dituzte. Hirugarren egunean, gaitasun adiskidetsuei eta garapen indibidualari erreparatuko diete. Eta amaitzeko, hilaren 29an, azken jokoak eta ospakizuna izango dira. Egunero, 15 minutuko atsedena ere hartuko dute, otordua egiteko.
Saskibaloi eskolen topaketak
Bestalde, igande honetan, hilak 10, saskibaloi eskolen topaketa egingo dute Domingo Agirre ikastetxeko kantxan, Gipuzkoako Saskibaloi Federazioak Andraitz elkartearen laguntzarekin antolatuta. Topaketa honetan, Andraitz berarekin batera, Eibarko, Debako eta Soraluzeko taldeek parte hartuko dute.
Jardunaldian lau partida jokatuko dituzte. 10:00etan, Andraitz eta Eibar Saskibaloia neurtuko dira; 10:45ean, Eibar Saskibaloia eta Debasket; 11:30ean, Soraluze eta Andraitz; eta 12:15ean, Debasket eta Soraluze. Jokalariak 2012an eta 2013an jaiotakoak dira.
