Gabonetarako egitarau zabala izango dute aurten ere Idiazabalen
Alaken azoka, iaz. //Argazkia: Idiazabalgo Udala Urtero bezala, Gabonetarako egitarau zabala prestatu du Idiazabalgo Udalak. Musika emanaldiak, haur eta gazteentzako tailerrak eta beste hainbat kultur ikuskizun izango dira aukeran.
Kultur ekitaldi nabarmenen artean, honakoak daude: Goierriko Bertsolarien saioa abenduaren 15ean, Herri arteko dantza topaketa 22an, Zuhaitz Gurrutxagaren Futbolistok bakarrizketa 23an eta Kalakan talde lapurtarraren kontzertua 29an.
Gaztelekuko ekintzak
LH 6tik DBH 3ko gazteentzako hainbat ikastaro antolatu dituzte Gaztelekuan abenduaren 26tik urtarrilaren 4ra bitartean.
Gabonetako sukaldaritza ikastaroak izango dira abenduaren 26an, 28an eta 30ean. Urtarrilaren 2an eta 4an, gaztelekuko pareta pintatzeko saioa antolatu dute maila guztietako gazteentzat, 16:30etik 19:30era.
Txuri Urdin izotz parkera irteera ere antolatu dute urtarrilaren 3an, hau ere, maila guztietako gazteei zuzenduta. Irteera 14:00etan da herriko plazan eta 21:00etarako aurreikusi dute itzulera. Izena ematerakoan 5 euro ordaindu beharko du parte hartzaile bakoitzak eta norberak bere bazkaria eraman beharko du.
LH 6koek kaskoa ere eraman beharko dute.
Gaztelekuko ekintza hauetan parte hartzeko aurretik izena eman behar da. Izen ematea abenduaren 19ra arte egongo da zabalik eta gaztelekuan bertan edo liburutegian egin daiteke.
Gabonetako erakusketa
Bestalde, abenduaren 17an egingo dute Alaken azoka, Igarondon, 11:00etatik 14:00etara. Parte hartu nahi dutenek abenduaren 13ra arteko epea dute izena emateko. Izena liburutegian edo udalaren web gunean eman daiteke. Abenduaren 22an Mari Dominigi eta altxor sekretua ikuskizuna izango da Zelaako kiroldegian, 17:00etan. Egun berean, 19:30ean herri arteko dantza topaketa egingo dute Igarondon. Abenduaren 24an, Olentzeroren etorrera izango da plazan.
Abenduaren 26tik urtarrilaren 4ra, Gabonetako sorkuntza lanen lehiaketako lanen erakusketa irekiko dute udaletxean. Sari banaketa urtarrilaren 5ean izango da. Amaitzeko, Gabonetako haur parkea abenduaren 28an eta 29an jarriko dute Igarondon.
