Mendiko federatu txartela ateratzeko aukera, datorren astean Idiazabalen
Urtero bezala, mendiko federatu txartela berritu edo lehenengo aldiz egiteko aukera izango da Idiazabalen ere. Idiazabal Kirol elkarteko mendi sailak egingo du aurten ere bitartekaritza lana. Elkarteko kideak abenduaren 20an eta 21ean 18:30etik 19:30era egongo dira udaletxean txartel hau tramitatu eta behar diren argibide guztiak emateko.
Txartel horren bitartez, mendian ibiltzeko aseguru berezia egiten da eta Mendizale Federazioak eskaintzen dituen zenbait zerbitzu erabiltzeko aukera dago, besteak beste, ikastaroak eta mendi aterpeetan tarifa merkeagoak.
