Zaldibian azoka solidarioa egingo dute gaur eta bihar
Xirika elkarteak antolatuta, herrian bildutako bigarren eskuko arropa salduko dute. Diru-etekinak Zaporeak elkartearentzat izango dira, errefuxiatu kanpamenduetarako elikagaiak erosteko. Soberan gera daitezkeen arropak, berriz, 'Aita Mari' erreskate-itsasontzira bidaliko dituzte. Gaur arratsaldean eta bihar goizean da azoka, plazan.
Asteburu honetan azoka solidarioa egingo dute, Zaldibian. Xirika elkarteak antolatu du, eta gaur eta bihar jarriko dute, plazan, Eguberrien testuinguruan kokatuta. Gaur, larunbata, 16:30etik 19:30era egongo dira, eta bihar igandea 10:30etik 13:30era.
Zaldibian bertan herritarrek emandako arropak salduko dituzte. Bi bilketa egin zituzten, azaro bukaeran eta abendu hasieran, herritarrei etxean soberan zituzten arropak helarazteko eskatuta.
Azoka solidarioan bigarren eskuko arropa salduko dute, bildutako diruarekin Zaporeak elkartearentzat elikagaiak erosteko asmoa daukate Xirikakoek, errefuxiatu kanpamenduetara eraman ditzaten.
Bestalde, saldu gabe geratzen diren arropak Aita Mari itsasontziko boluntarioei bidaliko dizkiete, Mediterraneo itsasoan erreskatatutako etorkinentzat erabilgarri izango dituztelakoan.
