Denboraldiko zazpigarren garaipena BeraBera-Ordizia taldearentzat
Larunbatean 95-5 irabazi zuten Arrasate-Eibar taldearen aurka. Bederatzi partida jokatu dituzte, eta bi bakarrik galdu.
![](https://goierri.hitza.eus/site/files/2024/01/bera_bera_ordizia_errugbi_.jpg)
Donostiako Bera Bera eta Ordiziako Rugby Neskak taldeetako neskek osatzen duten Bera Bera-Ordizia taldeak urteko lehen eta denboraldiko zazpigarren garaipena eskuratu zuen larunbatean. Emaitzari erreparatuta, erraz irabazi zion Eibar-Arrasate taldeari. 95-5 nagusitu ziren Donostia-Ordiziako neskak, Altamiran.
Emakumezko Euskal Ligako hamargarren jardunaldia izan zen. Bera Bera-Ordiziak bederatzi partida jokatu ditu. Zazpi irabazi eta bi bakarrik galdu dituzte. Hamahiru taldeko sailkapenean laugarren postuan daude, 33 punturekin. Lehenengo postuan Durango RT dago, 12 puntura.
Urtarrilaren 27an izango dute hurrengo partida, Elorrio/Urgozo RT taldearen aurka, Elorrion.