Domingo Agirre eskolako ikasleek ireki dute Emakumeen Egunaren egitarau Legazpin
Eskolara kamiseta morea jantzita joan dira, eta talde bat udaletxean izan da, alkateari eta bi zinegotziri eskolan landutakoa azaltzeko eta balkoian pankarta jartzeko. Arratsaldean kalejira egin dute. Bi elkarretaratze eta antzerki saio bat ere izango dira.
Martxoaren 8ari lotutako ekitaldi eta ospakizunak goizean hasi dira Legazpin, udaletxean, bertara Domingo Agirre eskola publikoko Lehen Hezkuntzako 5. eta 6. mailako ikasleek egindako bisitarekin. Ikasleak Eric Galvez alkatearekin, Berdintasuna alorreko zinegotzi Josu Santurderekin eta Hezkuntza alorreko zinegotzi Edurne Matiasekin elkartu dira, eta azken asteetan ikastetxean Emakumearen Eguna nola landu duten azaldu diete. Dantza saio txiki bat ere eskaini dute, Aske maite abestiak lagunduta, eta amaitzeko, eskolako pankarta jarri dute udaletxeko balkoian, “Pausoz pauso, emakumeak aurrera” leloarekin. Bertan, ikasle bakoitzak bere aztarna marraztuta utzi du.
Domingo Agirreko ikasleak eta irakasleak goizean hasi dira Martxoaren 8a ospatzen, eta eskolara kamiseta morea jantzita joan dira. Aurreko egunetan, geletan, Todos deberiamos ser feministas liburua irakurri eta eztabaidatu dute, eta Emakumeen Egunari buruzko bideoak ere ikusi dituzte. Hori guztia, eskolako Elkarbizitza Batzordeak prestatutako egitarauaren barruan landu dute.
Arratsaldean, kalejira, elkarretaratzeak eta antzerkia
Domingo Agirrekoi ikasleek arratsaldean jarraitu dute Martxoaren 8a ospatzen, eta kalejira egin dute Laubideko kale nagusitik. Eskolako ikasle eta irakasle guztiek parte hartu dute, herritar ugarirekin batera. Kalejiran musika izan dute lagun, Aske maite abestia hain zuzen. Amaieran, ikasleek “meriendatxoa” egin dute.
Arratsaldeko hurrengo hitzordua udaletxe aurreko plazan izango da, 18:00etan, Legazpiko Asanblada Feministak antolatuta. 20:00etan beste elkarretaratze bat dago deituta, Kale Zaharrean. Itaiak egin du deialdia, “Emakume langileok borrokara! Sozialismoa eraiki ” lelopean.
Antzerkia ere izango da gaur arratsaldean, Iratzarri emakumeen elkarteak antolatuta. Oihulari Klown taldeko VIrginia Imazek Sex or no sex clown saioa eskainiko du Latxartegi aretoan, doan, 19:30ean.
Domingo Agirreko ikasleak eta udal agintariak udaletxeko balkoian, eskolako pankarta jarri eta gero.Domingo Agirre eskola publikoa
