Olaberriko gazteak festara
Bigarren gazte festak antolatu dituzte, asteburu honetarako. Bertso afaria izango da bihar, 130 lagunentzat. Etzi, sagardo dastaketa, Korrika eta musika.
Olaberriko gazteak, San Joan festetako kirol erakustaldian. Loinaz Agirre Olaberriko Gazte Taldeak antolatuta, II. Gazte Festak ospatuko dituzte herrian, bihar eta etzi. Honezkero erabat sustraituta dagoen bertso-afariarekin hasiko dira, bihar. Hirugarren urtea du ekitaldi horrek, eta aurreko bi aldietako bertsolari hirukotea errepikatuko dute aurten ere: Iker Zubeldia, Aratz Igartzabal eta Mikel Etxezarreta herritarra.
Betekada hartuko du, beste behin, Ihurre Zaharra kultur etxeko aretoak, saltzeko atera zituzten 130 txartelak ahitu baitira. Afaria Seguran prestatuta ekarriko dute.
Larunbata izango da egitarauko egun beteena. 23. Korrikarekin bat eginez hasiko dute jardunaldia, Olaberria gainetik pasatuko baita. Gazte taldeak kilometro bat erosi du, Arrieta paretik Lazkaoranzko jaitsieran egokitu zaiena. Ondorenerako gosaria eta hamaiketakoa prestatu dituzte.
Eguerdian, poteoan ibiliko dira kaskoan: Arrieta, Zezilionea eta Arkupe soziedadearen artean egingo dute erronda.
Sagardoa eta kontzertuak
Zapatu arratserako, sagardo dastaketa antolatu dute. Eguraldiak laguntzen badu, Zezilioene aurreko plazan bospasei sagardotegitako edariak jarriko dituzte (bestela, frontoian). Edari banatzaile enpresak erabili ohi dituen ohikoak, eta Urbitartekoa eta Akarregikoa jarriko dituzte, azken horren nagusia Olaberrian bizi denez gero. Altsasuko Elektrokela elektrotxaranga ariko da.
Afaldu bertan egin nahi duenak ere izango du modua. Gazte taldekoen guraso batzuek lagunduta, ogitartekoak egin eta salduko dituzte. Mahaiak eta aulkiak muntatuko dituzte.
Gauean, udaletxe alboko Bujanda eta Lasa Plazan, Raimundo el Canastero Lizarrako taldeak joko du. 15 bat lagun dira, eta euren ondo pasatzeko gogoa kutsatzen dute emanaldian. Trikidantz erromeria taldeak borobilduko du gazte festa. Txosna ere jarriko dute, bolatokian (igandean 17:00etan kenduko dute).
Bihar, ostirala
- 19:30. Triki-poteoa, Larrañaga eta Intsausti trikitilariekin.
- 21:00. Bertso afaria, Ihurre Zaharrean. Mikel Etxezarreta, Aratz Igartzabal, Iker Zubeldia.
Ondoren. Trikitilariak.
Etzi, larunbata
- 10:30. 23.Korrikara.
- 12:00. Pintxo-poteo herrikoia.
- 18:30. Txosna irekiera eta sagardo dastatzea.
- 19:00. Elektrokela txaranga.
- 21:00. Ogitartekoak salgai.
- 23:00. Kontzertuak: Raimundo el Canastero, eta Trikidantz.
