Aner Peritz 'Euzkitze'-k irabazi du 52. Osinalde bertsolari sariketa
Bertsolari zarauztarrak hirugarren partaidetzan eta bigarren finalean lortu du irabazlearen garaikurra, seguru eta erraz kantatuta. Aitor Tatiegi oñatiarrak bi sari eraman ditu: entzuleen saria eta bertsorik onenarena.
Bertsolaritzaren labealdi berriek saio dotorea eta goi mailakoa egin dute 52. Osinalde Sarian. Larunbat gauean jokatu zen sariketaren finala, Gabirian, izen bereko elkartean. Saioa ona izan zen, eta sei bertsolariek utzi zituzten printza bikainak.
Aner Peritz Euzkitze zarauztarrak, hasi eta buka, saio borobila osatu du. Seguru aritu da, konfiantzaz eta arrazoiketan bere burua beti koska bat gorago behartuta. Hirugarren partaidetza zuen Osinalderen sendiko sariketetan, azkena beraz. Iaz bigarren postuan geratu bazen, aurten garailearen garaikurra jaso du.
Sailkapena estu jarri du Aitor Tatiegi oñatiarrak. Behetik gora egin zuen saioan, eta goi mailan aritu zen hura ere; bigarren aldiz izan da Osinalden. Epaileen puntuaketan ez, baina entzuleen irudipenean gustukoena Tatiegi izan da, eta haien saria jaso du. Baita bertsorik onenarena ere. Kartzelako lanean, ofizioka Eki Mateorenarekin hamarreko txikian botatako lehenengo bertsoak merezi izan zion sari hori; “elkartzeko ez al da / egiten orea / nere denbora eta / zure zaporea” bukatu zuen bertsoa, “badakizue ez dela komeni, buruhaustea besterik ez dizuela ekarriko, baina bion arteko tentsio sexuala handiegia da” gaiari. Aurrez, kartzelako lehen ariketa modura, hitz banari kantatu behar izan zien; Mateorenak ‘zaporea’-ri eta Tatiegik ‘denbora’-ri.
Maddi Aiestaran beasaindarra zen ordezkari goierritar bakarra. Bittor Altube abadiñarra, Aitor Ugarte aramaioarra eta Eki Mateorena leitzarra ziren seikotean, Peritz eta Tatiegi sarituekin batera. Hego Euskal Herriko lau herrialdeek izan dute, beraz, ordezkaritza.
Epaile lanetan Asier Iriondo, Asier Ibaibarriaga, Lurdes Murua, Aratz Igartzabal eta Eresti Oiarbide aritu ziren. Ane Etxezarretak aurkeztu zuen saioa. Afaltzen 128 lagun izan ziren, eta entzule gehiago sartu ziren saioa entzutera. Errifaren zozketan, zenbaki sarituak 1161, 1221 eta 310 dira.
Argazkiak: Aimar Maiz Morea
Osinalde Saria, Gabirian. Maddi Aiestaran.Aimar Maiz
Aner Peritz, kantuan.
Ane Etxezarreta aurkezlea.
Tatiegi, Ugarte eta Aiestaran.
Ugarte, Aiestaran eta Altube.
Bittor Altube kantuan.
Aitor Tatiegi, bi sariak aurrean dituela. Ondoan, Mateorena.
Sei bertsolariak Osinaldeko mahaian.
Peritz eta Mateorena.
Entzuleak bertsolariei adi, afal ondoren.
Bertsolariak, saioa bukatutakoan.
Irabazleari saria ematen.
