Goierriko 15 bertsolarik parte hartuko dute Gipuzkoa Bertsotan lehiaketan
Gipuzkoako Bertsolari Txapelketarako sailkagarri izango den udaberriko fasean ariko dira. Bost aurkezle eta bi epaile ere emango ditu eskualdeak. Goierrin bost saio jokatuko dira, Gabirian, Zaldibian, Legorretan, Idiazabalen eta Ataunen.
2019ko Gipuzkoa Bertsotan lehiaketako saio bat, Idiazabalen.Gipuzkoako Bertsozale Elkartea Gipuzkoako Bertsolari Txapelketaren urtea da 2024a. Duela lau urte bezala, aurrez, udaberrian, Gipuzkoa Bertsotan lehiaketa antolatu du Gipuzkoako Bertsozale Elkarteak. Gaur aurkeztu dute. 74 bertsolarik parte hartuko dute, apirilaren 25ean hasita, hilabete eta erdian. Horietatik 34k lortuko dute udazkeneko txapelketarako txartela.
Beste behin, Goierrik partaidetza oparoa izango du Gipuzkoa Bertsotan lehiaketan. 15 bertsolari, bost aurkezle eta bi epaile daude gaur argitaratutako zerrendan. Presentzia tokiz ere edukiko du eskualdeak, bost saio antolatu baitituzte. Sailkatzeko lehen fasean Gabirian (apirilak 26), Zaldibian (maiatzak 2), Legorretan (maiatzak 3), Idiazabalen (maiatzak 9) eta bigarren fasean Ataunen (ekainak 1) izango dira.
Gipuzkoa Bertsotan lehiaketak bi zati izango ditu. Lehenbizikoan, apirilaren 25etik maiatzaren 17ra, izena emandako 74 bertsolariek kantatuko dute. Hamabi herritan izango dira saioak, berritasun batekin: saioak ostegun edo ostiral iluntzeetan izango dira, kultur etxe edo areto txikietan. Ondoren, afari-meriendak egingo dituzte.
Bigarren fasera 48 bertsolarik egingo dute aurrera. Beste zortzi saio izango ditu horrek, maiatzaren 25etik ekainaren 2ra. Multzo horretatik 34k joko dute udazkeneko txapelketara.
Urteurren berezi bati ere egingo dio keinu Gipuzkoa Bertsotan. Herrialdeko lehenengo bertso eskola sortu zutela 50 urte beteko dira aurten. Bertso eskolari egin nahi dio omenaldia eta jarriko dio arreta lehiaketak. Unai Gaztelumendik diseinatu du irudia, bertso-eskoletako lehen belaunaldien irudiekin eta Uztapiderekin.
Goierriko bertsolariak:
- German Urteaga Garmendia (Beasain, 1995). Anoetan ariko da, maiatzaren 10ean.
- June Aiestaran Iparragirre (Beasain, 2006). Oñatin, maiatzaren 17an.
- Maddi Aiestaran Iparragirre (Beasain, 2001). Oñatin, maiatzaren 17an.
- Gorka Maiz Alustiza (Gabiria, 1989). Legorretan, maiatzaren 3an.
- Aratz Igartzabal Bidegain (Gabiria, 1996). Orion, maiatzaren 3an.
- Ane Beloki Lopez (Legazpi, 1999). Orion, maiatzaren 3an.
- Odei Lopez Larrauri (Legorreta, 1988). Getarian, maiatzaren 9an.
- Mikel Etxezarreta Lasa (Olaberria, 2003). Altzon, maiatzaren 2an.
- Eneko Araiztegi Agirre (Segura, 1996). Zestoan, apirilaren 26an.
- Mikel Iturriotz Etxaniz (Urretxu, 1995). Idiazabalen, maiatzaren 9an.
- Uxue Fernandez Lasa (Urretxu, 1984). Gabirian, apirilaren 26an.
- Antton Fernandez Lasa (Urretxu, 1982). Eskoriatzan, apirilaren 25ean.
- Maialen Akizu Bidegain (Urretxu, 1996). Legorretan, maiatzaren 3an.
- Maide Garmendia Jauregi (Zaldibia, 2002). Oñatin, maiatzaren 17an.
- Endika Igartzabal Murua (Gabiria, 1991). Idiazabalen, maiatzaren 9an.
Gai jartzaile goierritarrak:
- Aizpea Garmendia (Lazkao, 1998)
- Asier Iriondo (Legazpi, 1973)
- Iker Iriarte (Alegia, 1984; Zaldibian bizi da)
- Irati Sanchez de Arevalo (Zumarraga, 1997)
- Saroi Jauregi (Zaldibia, 1978)
Epaile eta idazkari goierritarrak:
- Maite Sukia (Ataun, 1981)
- Mikel Urteaga (Beasain, 1982)
Saioak Goierrin eta egutegi osoa:
Sailkapen fasea
- Apirilak 25, osteguna, Eskoriatzan.
- Apirilak 26, ostirala, Zestoan.
- Apirilak 26, ostirala, Gabirian. 19:00etan, kultur etxean. Bertsolariak: Aitor Tatiegi, Aitor Zubikarai, Andoni Mujika, Maider Arregi, Urko Egaña eta Uxue Fernandez.
- Maiatzak 2,osteguna, Altzon.
- Maiatzak 2, osteguna, Zaldibian. 19:00etan, Herri Antzokian. Bertsolariak: Aitor Salegi, Ander Zulaika, Antton Aizpurua, Irati Arakistain, Manu Goiogana eta Uxue Alkorta.
- Maiatzak 3, ostirala, Orion.
- Maiatzak 3, ostirala, Legorretan. 19:00etan, Herri Antzokian. Bertsolariak: Ane Zuazubiskar, Beñat Zeberio, Gorka Maiz, Maialen Akizu, Naia Arrizabalaga eta Unai Izagirre.
- Maiatzak 9, osteguna, Idiazabalen. 19:00etan, Guraso Elkartean. Bertsolariak: Aner Peritz Euzkitze, Eli Pagola, Endika Igartzabal, Igauri Lopetegi, Mikel Iturriotz eta Oier Etxeberria.
- Maiatzak 9, osteguna, Getarian.
- Maiatzak 10, ostirala, Mutrikun.
- Maiatzak 10, ostirala, Anoetan.
- Maiatzak 17, ostirala, Oñatin.
Bigarren fasea
- Maiatzak 25, larunbata. Antzuolan eta Pasaian.
- Maiatzak 26, igandea. Alegian eta Usurbilen.
- Ekainak 1, larunbata. Ataunen eta Elgetan.
- Ekainak 2, igandea. Soraluzen eta Hernanin.
2019ko Gipuzkoa Bertsotan lehiaketako saio bat, Idiazabalen.Gipuzkoako Bertsozale Elkartea
