Eusko Legebiltzarrerako hauteskundeak
ALEX GONZALEZ. PSE-EE
«Proiektu ezkertiar ez abertzalea duen lehen indar politikoa gara»
«Oso positibotzat» baloratu ditu PSE-EEren emaitzak Alex Gonzalez urretxuarrak, 10 eserleku izatetik 12rako saltoa ahalbideratu diotenak, nahiz eta, «abstentzio handiak» –Goierrin %37,49– eraginik izan duen. Sozialistek gora egin dute boto kopuruan Goierriko hainbat herritan, «Urretxun eta Zumarragan», adibidez. Eusko Legebiltzarrean «hirugarren indarra gara, baina garrantzitsuagoa dena, proiektu ezkertiar ez abertzale bat aurkeztu duen lehen indarra gara», dio. Gobernu «indartsu eta egonkor» baten alde lan egiteko konpromisoa berretsi du, «elkarbizitzan, akordioan eta elkartasunean» oinarrituta. «Euskadiren berreraikitze sozial eta ekonomikoaren alde lan egingo dugu, pertsonak ardatz hartuta», amaitu du.
