Saguzarren gaua egingo dute Ordizian
Ekainaren 14an Oiangu baserrian elkartuko dira, 21:15ean. Handik Ordiziara oinez jaitsiko dira, detektagailuen bidez ibilbidean zehar saguzarren deiak entzunez.
Saguzarra Gure bizilagunik onenak lelopean, Saguzarren gaua antolatu du Landarlan elkarteak ekainaren 14rako Ordizian. Familiei zuzendutako saioa da. Oiangu baserrian, 21:15ean elkartuko dira. Saguzarrei buruzko erakusketa ikusi eta informazioa jaso ondoren, detekzio ibilaldia egingo dute. “Oiangu baserritik oinez Ordizia aldera jaitsiko gara saguzarren deiak entzunez, Naturtzaindiako adituei esker. Ekintza honen bitartez saguzarren ezagupena eta beren biziraupena babestea bultzatu nahi ditugu eta Ordiziako udalaren laguntzari esker burutu dezakegu. Ilunduko duenez, bertaratzen direnei eskatzen diegu, badaezpada esku-argiak eramateko”.
Euria egingo balu, ekintza bertan behera geratuko litzateke. Informazio gehiago nahi izanez gero, info@landarlan.eus helbidera idatz daiteke.
