Ordizian babes ofizialeko alokairuko 60 etxebizitza sustatzeko hitzarmena
Ordiziako Udalak eta Visesak hitzarmena sinatu dute San Juan auzoan babes ofizialeko alokairuko 60 etxebizitza sustatzeko.
Adur Ezenarro Ordiziako alkatea eta Carlos Quindós Visesako zuzendari nagusia.Loinaz Agirre Ordiziako Udalak, Ordizia Lantzen udal sozietateak eta Visesa sozietate publikoak gaur eguerdian sinatu duten hitzarmenaren ondorioz, “Visesak doan erosi du a.40.6/1 partzela, A.I.U.22 – San Juan Hirigintzako Esku-hartze Arloan dagoena, alokairuko babes publikoko etxebizitzen sustapen bat egiteko”. Hitzarmena Adur Ezenarro Agirre Ordiziako alkateak sinatu du, udalaren eta udal-sozietatearen ordezkari gisa, eta Carlos Quindós Visesako zuzendari nagusiak, Eusko Jaurlaritzako Lurralde Plangintza, Etxebizitza eta Garraio Saileko sozietate publikoaren izenean.
Ezenarroren esanetan, lurzati horretan alokairuko erregimen orokorreko babes publikoko 60 etxebizitza inguru egin ahal izateko, eta sustatu beharreko garaje-partzelen kopurua doitzeko, udalak eta Ordizia Lantzen elkarteak Plan Partzialaren aldaketa izapidetuko dute. Era berean, “Plan Partzialaren aldaketa horrek aldameneko a.40.6/2 lurzatiko etxebizitzen kopurua ere handituko du, alokairuko araubide orokorreko babes publikoko 48 etxebizitza egin ahal izateko, eta Ordizia Lantzenen titulartasuneko a.40.7.1 eta a.40.7.2 etxebizitza babestuen lurzatietako nahitaezko garaje-plazen kopurua ere ahalik eta gehien murriztuko du, Visesak sustatzen duen alokairuko etxebizitza babestuaren beharretara hobeto egokitzeko helburuarekin, eta hitzarmen honetako baldintzak aipatutako lurzatietara zabaltzeko aukera egon dadin”.
Honela, “lagapen horiek gauzatuta, Ordiziak lortuko luke 190 etxebizitza publikoko parke bat alokairurako. Horri gehitu behar zaio dagoeneko eraikitzeko prozesuan dauden beste 36ak. Beraz, 216 etxebizitza izango lirateke”.
Etxebizitza horietako baten esleipendun izateko, Etxebide-Euskal Etxebizitza Zerbitzuak ezarritako baldintzak betetzeaz gain, udalerrian gutxienez urtebetez jarraian edo 3 urtez txandaka erroldatuta egon dela egiaztatu beharko da azken 5 urteetan.
“Proiektu honen helburua udalerriko pertsonen etxebizitza-premiei erantzutea da, eta Eusko Jaurlaritzako Etxebizitza Sailburuordetzak etxebizitza duin eta irisgarria izateko eskubidea azkartzeko hartutako konpromisoaren barruan kokatzen da”.
