Hector Alvarez Martinezek irabazi du Gipuzkoako gazteen txirrindulari itzulia
Legazpin hasi eta Telleriarten amaitu zen atzo erronda, laugarren etaparekin. Atzoko lasterketa Iker Gomezek irabazi zuen. Itzuliko lehen legazpiarra Ekain Lizeaga izan da.
Itzuliko sailkapen nagusiko saritu guztiak. Legazpiko Telleriarte auzoan amaitu zen atzo Gipuzkoako Gazteen Txirrindulari Itzuliaren 34. edizioa, eta LUCT taldeko Hector Alvarez Martinezek (Alacant, Espainia) jantzi zuen irabazlearen txapela. Atzoko etapa, Itzuliaren laugarrena, QALB taldeko Iker Gomez de Goikoetxea altsasuarrak (Nafarroa) irabazi zuen. Bestalde, Ekain Lizeaga izan da Itzuliko lehen legazpiarra.
Eguraldia lagun, lasterketa 16:00etan abiatu zen Legazpiko erdigunetik, eta 17:45 inguruan iritsi zen lehen sailkatua auzoko Agerre baserriaren parean jarritako helmugara. Etapa 74,5 kilometrokoa zen, eta batez beste 42,336 kilometroko orduko abiadurarekin egin zuten ibilbidea txirrindulariek. 124 iritsi ziren helmugara. Sari banaketa ekitaldia Harrizabala plazan egin zuten, eta udalak oroigarri bat eman zion Sebastian Santestebani, txirrindularitzaren alde egindako urte askotako lanagatik. Juan Mari Burguera herriko artistak egindako eskultura lan bat jaso zuen Santestebanek.
Txirrindulari gora Telleriarten
Proba honekin, aspaldian ezagutzen ez zen txirrindulari giroa bizi izan zen Telleriarten arratsalde osoan, batez ere helmuga aurretik txirrindulariek igo behar zuten San Joango estrataren inguruan. Baina kaos puntu bat ere izan zen auzoan eta errepideetan, elkartu ziren txirrindulariengatik, taldeen ibilgailuengatik eta zaletuengatik. Antolatzaileek barkamena eskatu nahi diete sortutako eragozpen guztiengatik bereziki Telleriarteko eta Brinkolako bizilagunei.
Gipuzkoako junior Itzulia Idiazabalen hasi zen ostiralean, eta laugarren etaparekin amaitu zen atzo Telleriarten. Gipuzkoako Txirrindulari Federazioak egin zion proposamena Legazpiko Udalari etapa hori antolatzeko, eta Telleriarteko Txirrindulari elkartearen laguntza izan du horretarako.
SAILKAPENAK
- Legazpi-Telleriarte, 4. etapa
1. Iker Gomez (QALB)
2. Hector Martinez ((LUCT)
3. Lohann Vulliez ((TIPA) - Sailkapen orokorra
1. Hector Martinez
2. Iker Gomez
3. Lohann Vulliez
Lehen legazpiarra: Ekain Lizeaga - Taldekako sailkapen orokorra
1. KH7 Cycling Team
2. AMPO
3. LUCTA-Grnja Rimya - Mendia, sailkapena orokorra
1. Iker Gomez
2. Iker Villar
3. Hector Alvarez - Tarteko helmugak, sailkapen orokorra
1. Arkatz Suso
2. Hector Alvarez
3. Oier Arana - Lehen urteko juniorrak, sailkapen orokorra
1. Beñat Sainz
2. Sergio Gamez
3. Joan Cardona - Gipuzkoarrak, sailkapen orokorra
1. Beñat Sainz
2. Joan Cardona
3. Eñaut Urkaregi
Itzuliko lehen hiru sailkatuak.
Laugarren eta azken etapako irabazleak
