Auzoko jubilatuek hasi dituzte San Agustin festak Brinkolan
Aspaldiko talderik handiena bildu da gaurko ospakizunerako, 27 lagun. Ostiralean eta larunbatean izango dute jarraipena jaiek.
Gaur, abuztuak 28, auzoko zaindariaren egunean bertan, festatan murgildu da Brinkola, jubilatuen bazkariarekin. Ostiralean eta larunbatean izango dute jarraipena jaiek, ekitaldiz beteriko bi egunekin.
Jubilatuek meza izan dute lehenik, hamaiketakoa ondoren eliza atarian, eta gero Armuño elkartean bazkaldu dute, 27 laguneko kuadrilla osatuz, aspaldiko handiena.
1974ko jaialdia gogoratuz
Ostiralean eta larunbatean bildu da aurtengo jaietako egitaraua, eta aldaketak izan dira, ekitaldi batzuk ez direlako egingo, eta beste batzuk egunez aldatu direlako, ostiral arratsaldera aurreratu diren haurren jolasak eta patata tortilla lehiaketa bezala.
Izan ere, larunbata ia osorik gorde da duela 50 urteko abuztuaren 31n auzoan egin zen jaialdia gogoratzeko. Orduko kantarietako batzuk gonbidatu dituzte, eta mahai inguru bat eta kantaldi bat prestatu dituzte. Kantaldian Legazpiko musikari eta kantariek parte hartuko dute, eta duela 50 urteko abestiak eskainiko dituzte.
Bestela, afariak, kantu bazkaria, rock kontzertua, bolak eta Elustondo trikitilarien erromeria ere izango dira. Ohi bezala, larunbat goizaldean autobusa izango da Legazpira itzultzeko.
EGITARAUA
Ostirala, abuztuak 30
18:00 Txupinazoa eta ikurriña altxatzea Armuño elkartean, Txost taldearen eta txalapartarien eskutik
Ondoren, haurrentzako jolasak Sorgintxulorekin, eta patata tortilla lehiaketa
21:00 Paella afaria Armuño elkartean
23:00 Rock kontzertuak eta Dj saioa: Eraso, Rodeo eta Letagin taldeak, eta Dj Woolen
04:00 Legazpira bueltatzeko autobusa
Larunbata, abuztuak 31
10:30 Txistularien goiz eresia auzoan zehar
12:30 Mahai ingurua, ‘Euskal kantagintzaren nondik norakoa’ gaiarekin. Partaideak: Pantxoa Karrere, Peio Ospital, Jon Enbeita, Koro Urbieta, Mikel Urteaga, Joxe Mari Telleria eta Jose Angel Urbieta. Moderatzailea: Jokin Matxinandiarena
14:00 Kantu bazkaria
18:00 Bola txapelketa
19:00 Musika emanaldia, 1974ko jaialdia gogoratzeko: Xabier Barriola, Jesus Castillejo, Iñigo Caballero, Maria Redondo, Amaia Aranguren, Jose Angel Urbieta, Mikel Alustiza eta Zumarragako trikitixa.
21:00 Auzo afaria Armuño elkartean, Elustondo anai-arrebekin
