Euskal Jaiak

Gazta enkantea, online ere bai

Irailaren 7tik 15era bitartean ospatuko diren Euskal Jaien barruan, asteazkena izango da egunik handiena, aparteko azoka. Gazta irabazlearen enkantean online parte hartzeko aukera ere izango da aurten.

Loinaz Agirre

Ordizia

2024/09/04

Irailaren 7tik 15era bitartean izango da aurten Euskal Jaien astea Ordizian. Egun handiena, datorren asteazkena izango da, irailaren 11, azokarik bereziena egingo baita. Fruitu, barazki, euskal oilo eta behi haziendarik ederrenak ikusi eta erosteko aukera izango da. Eta nola ez, gaztarik onena zein den erabakiko da Beti Alai pilotalekuan. 13:30ak aldera jakinaraziko da latxa edo karrantzako ardiaren esne gordinez egindako 51. gazta lehiaketaren irabazlea nor den.

Gazta lehiaketari lotuta, berrikuntzak izango dira aurten. Batetik, ordutegiak eta sistema informatikoa egokitu dituzte, eta epaimahaikideen erabakia eta sari banaketa azkarrago egiteko helburuarekin. Bestetik, gazta irabazlearen enkantean online parte hartzeko aukera ere izango da aurten. Enkantean modu birtualean parte hartzeko aurrez eman beharko da, https://enkante.eus/erregistroa webgunea sartu eta eskatzen diren datuak beteta.

Iaz, Super Amarak, 3.550 euro ordaindu zituen gazta erdiagatik.

Gazta lehiaketa azken hamar urteetan hiru aldiz irabazi duen gaztagileak, Julen Arburuak, Urrezko Kutxa garaikurra irabazteko aukera izango du. Bestalde, 2014az geroztik gazta lehiaketan irabazle izan diren artzainen gaztak Beti Alai pilotalekuko frontoi txikian izango dira salgai aurten.

Asteazkenean Ordiziara joateko garraio publikoa erabiltzeko eskatu du Adur Ezenarro alkateak gaurko aurkezpenean.

Euskal Jaietako egunez eguneko egitaraua:

Irailak 7, larunbata: Emaneurre Euskarari! Eguna

10:30: Kuadrillen arteko herri kirolak, bertsolariek girotuta. Plaza Nagusian.
15:00: Kantu bazkari herrikoia, pilotalekuan.
16:30: Saioa Lizarralde eta Maialen Arzallus bertsolarien saioa.
18:30: Elektrokela elektrotxaranga.
23:00: Gozategi taldearen erromeria, Plaza Nagusian.

Irailak 8, igandea: Jubilatuen Eguna

13:15: Laguntasuna Errondailaren emanaldia, Arboledan.
14:15: Jubilatu eta pentsiodunen bazkaria, Goierriko Bertso Eskolakok bertsolarien agurrarekin. Bazkalondoren, dantzaldia.
18:30: Artea antzezlana, Herri Antzokian. Aktoreak: Ramon Agirre, Joseba Apaolaza eta Asier Hormaza.

Irailak 10, asteartea

19:00: Udaletxetik abiatuta, Azen Erraldoien konpartsaren eskutik erraldoiak eta buruhandiak, eta Burrunbazale txaranga.
19:00: Ardo eta sagardo postuen irekiera, Arboledan.

Irailak 11, asteazkena

08:45: D’Elikatuz zentrotik abiatuta, Ordiziako Idiazabal Gaztaren Kofradiako kideen eta artzainen desfilea, gazta lehiaketan parte hartuko duten gaztak Beti Alai pilotalekura eramateko, trikitilari eta dultzaineroek lagunduta.
09:00: Diana Ordiziako txistularien eskutik.
10:00: Gazta, ganadu, lumagorri, fruta eta barazkien lehiaketak.
11:00-14:00: Foru pasealekuan, Euskal photocalla.
12:00: Jose Migel Barandiaran plazan, fruta, barazki eta lumagorri lehiaketen sari banaketa.
13:00: Garagartza plazan, ganadu lehiaketaren sari banaketa.
13:30: Beti Alai pilotalekuan, gazta lehiaketaren sari banaketa eta enkantea.
17:30: Beti Alai pilotalekuan, profesionalen arteko erremonte partidak.
18:30: Plaza Nagusian, Muxutruk taldearekin erromeria.
19:00: Jose Migel Barandiaran plazan herri kirol jaialdia. Aizkolariak: Iker Vicente-Iñaki Azurmendi Julen Alberdi-Ugaitz Mugerzaren aurka. Harri jasotzaileak: Urdax Magunazelaia, Udane Ostolaza eta Olaia Esnaola.

Irailak 12, osteguna

19:00: Herri Antzokian, Arantzazu filmaren proiekzioa, aurkezpena eta mahai ingurua. Zuzendaria bertan egongo da.

Irailak 13, ostirala

19:00: Plaza Nagusian, Urdaneta dantza taldearen emanaldia.
20:00: Plaza Nagusian, Ordizia Futbol Elkartearen 2024-2025 denboraldiko taldeen aurkezpena.
20:30: Herri Antzokian, Zopa antzezlana.

Irailak 14, larunbata

11:00-13:30 / 16:30-20:00: Barandiaran plazan, haur parkea puzgarriekin.
12:30: Oiangu parkea, Aftersun jaia. Kontzertuak: Sara Zozaya, Ghau, Yaima Orozco, Ixabe, Dj Necora.
17:00: Beti Alai pilotalekuan, pilota partidak: Alberdi II.a-Lizeaga Senar-Elizegiren aurka; eta Laso-Iztueta Artola-Imazen aurka.
19:00: Sagardo festa, Zuhaiztian.
23:00: Plaza Nagusian, Janus Lester.

Irailak 15, igandea