Jubilatuentzat aste osorako ekitaldiak antolatu dituzte Zaldibian
Irteeren bideo emanaldiarekin hasiko du Beti Gazte elkarteak egitaraua, bihar.
Zaldibiako jubilatu eguna, iaz. Jubilatuek 2010-2015 urte artean eta 2024ko lehenengo erdian egindako irteeren bideo emanaldia izango da bihar, 17:00etan, udaletxeko herri aretoan. Asteazkenean, ordu berean, kartetan eta mahai-jokoetan jolastuko dira.
Gau Beltzaz hitzaldia
Ostegunean Gau Beltzari edo Arimen gauari buruzko hitzaldia antolatu du Beti Gaztek. Josu Ozaita antropologo ibartarrak Arimen Gaua, itzalitako kalabazaren berpiztea gaia jorratuko du, urriaren 31 gaueko tradizioez. Garai bateko ohiturak zer ziren, eta nola berritu landuko du.
Ekinaldi bikoitza prestatu dute ostiralerako. Goizean, 09:30ean, lagun artean ibiltzeko Ttipi-Ttapa ekimeneko txangoa egingo dute, Olaldeko parkean. Salda hartuko dute gero. Arratsaldean, berriz, toka txapelketa herrikoia jarriko dute plazan, 17:00etan, eta bingoan jolastuko dira ondoren herri aretoan.
Jubilatuen bazkaria igandean da, 14:00etan, Zubi-Buru elkartean. Txartelak 20 euroan ari dira saltzen. 11:00etan meza izango da.
Zaldibiako jubilatu eguna, iaz.
