Inoizko Ordiziarrock jaialdirik jendetsuena
Ordiziarrock elkarteak izen bereko musika jaialdiaren "balorazio oso positiboa" egin du. "Batetik, inoiz izan den Ordiziarrockik jendetsuena izan delako. Eta bestetik, musikariak eta antolakuntzak orokorrean erakutsi duen kalitatea izugarria izan delako".
Ordiziarrock elkarteak ostegunetik larunbatera bitartean Ordizian izan den izen bereko musika jaialdiaren “balorazio oso positiboa” egin du. “Batetik, inoiz izan den Ordiziarrockik jendetsuena izan delako. Eta bestetik, musikariak eta antolakuntzak orokorrean erakutsi duen kalitatea izugarria izan delako. Bertako musikari mordo bat egon da oholtza gainean eta adin eta gustu guztietako ikusleak izan dira. Beraz, helburuak beteta daudela uste dut. Herrian ere jende asko ibili da eta hori ere gure helburuetako bat da. Herriko ostalaritzari bultzada bat eman eta laguntzea. Oso-oso pozik gaude”.
Orain, “kontuak egin behar, behatzak gurutzatu eta diruak iristen zaizkigun” ikusteko garaia dela diote Ordiziarrockekok. “Eta aurrera! Hasi gara jada hurrengo urteko jaialdiari eta hurrengo ikasturteari begira. Uste dut hurrengo urtean ere Ordiziarrock izango dugula”.
Eskerrak eman nahi izan dizkie “jaialdi hau aurrera ateratzen lagundu diguten guztiei, beraiei gabe ezin izango zelako posible izan”. Eta aldi berean, “barkamena” eskatu die bizilagunei: “Saiatzen gara ahalik eta zarata gutxiena ateratzen tela sistemen bitartez eta gauzatxo batzuk zaintzen ari gara. Uste dut hasierako ekitaldietatik gaur artera, asko hobetu dela”.