Atzegik boluntario izatera deitu ditu 55 urtetik gorakoak
‘Orain duzu aukera. Egin zaitez boluntario’ da aurtengo leloa. Haien alea jarri nahi dutenek izena eman dezakete. Azpimarratu dute «denbora librea eta partekatzeko gogoa besterik ez» dela behar.
Atzegik 2024ko sentsibilizazio kanpaina abiatu dute Orain duzu aukera leloarekin, 55 urtetik gorako pertsonak boluntario egitera animatzeko helburuarekin. Herenegun aurkeztu zuten Gipuzkoa mailako kanpaina Donostian, eta eskualdez eskualde egingo dituzte agerraldiak. Atzo, Goierri beheko aurkezpena egin zuten, Beasainen, udaletxean, eta gaur, Goierri goian, Legazpin. Horrekin batera, aurreikusitako ekintzen artean, Atzegiko familiek 4.000 kartel jarriko dituzte boluntariotza egiteko moduak erakusteko. Aurten, halaber, informazio-liburuxka bat eta bideo bat ere diseinatu dituzte.
Atzegiren ibilbide luzean egindako lanaren berri eman ondoren, Goreti Etxebarriak aurtengo kanpainaren xehetasunak eman zituen.
Lehenik eta behin «boluntarioen lana» goraipatu nahi izan du Atzegik. «Boluntarioen lana ezinbestekoa da Atzegitik eskaintzen diren aisialdiko jarduera asko aurrera eraman ahal izateko, baita gizartean parte hartzeko aukera gehiago eskaintzeko». Urtean zehar egiten dituzten hamarnaka ekintza burutu ahal izateko «350 lagun inguruk laguntzen dute».
Aurtengo kanpainarekin 55 urtetik gorako pertsonengana iritsi nahi dute, boluntariotzara gertura daitezen. Hori dela eta, Atzegik azpimarratu du boluntariotza egiteko ez dela inolako prestakuntzarik behar, «denbora librea eta partekatzeko gogoa izatea besterik ez». Aurkezpenean azaldu zutenez, Atzegin boluntariotza egiten duten pertsona gehienak gazteak eta ikasleak dira, baina azken urteetan beste adin-tarte bateko pertsonak ere batu dira, «oso lan garrantzitsua» egiten ari direnak. «Hori dela eta, Atzegik fokua belaunaldi horretan jartzea erabaki du. Izan ere, belaunaldi horrek, oro har, denbora libre gehiago izan dezake eta ekarpen handia egin», adierazi zuen Etxebarriak.
Era berean, gogoratu zuen, «boluntarioen laguntza behar duten jarduerak adimen-desgaitasuna duten pertsonen bizi-kalitatea hobetzera» zuzenduta daudela, batez ere aisialdian. «Jarduerak askotarikoak dira: taldeka edo banaka egin daitezke; dagoeneko antolatuta dauden jardueretan parte har dezakete, hala nola mendi irteeretan, futbolean edo txangoetan, baina bestelako planak ere izan daitezke, esaterako, kafe bat hartzea, erosketak egitera joatea edo paseo bat ematea», azaldu zuen Atzegiko kideak. Gainera, adimen-desgaitasuna duten pertsonek adin bereko pertsonekin aisialdia partekatzeko aukera izatea ere bultzatu nahi dute, zaletasunak eta kezkak partekatzeko aukera izan dezaten.
Eman izena
Boluntario izan nahi duten pertsonek Atzegirekin harremanetan jarri besterik ez dute egin behar, horretarako haien bulegora bertaratuta edo 943 42 39 42 telefonora deituta.