Garbiketa eta berreraikuntza lanetan laguntzeko bertara joango den boluntario talde batek antolatu du bilketa. Gaztetxean ere bihar egingo dute beste bilketa bat, pintxo-potea baliatuz.
Valentziako hondamendiaren kaltetuekiko elkartasunak ez du etenik Goierrin. Oraingoan, Legazpin, bertara laguntzera joango den talde bat sortu da, eta egun hauetan hara eramateko materiala bilduko dute. Eta Gaztetxeak ere bere alea jarriko du Valentziaren alde, biharko pintxo-potean
“Legazpitik gure elkartasuna eta babesa adierazi nahi diegu kaltetuei”, diote bi aste barru garbiketa eta berreraikuntza lanetan laguntzeko bertaraino joango diren boluntarioak, eta gainerako legazpiarrei laguntza eskatu diete. Batetik, dirua eskatu diete, “edozein kopuru, txikia izanda ere, laguntza handia da”, eta 658706305 (SORAYA) zenbakia jarri dute Bizuma egiteko. Bestetik, materiala ere eskatu diete.
Material bilketa Santikutz kaleko 19. atarian Sukalde dendak zuen lokalean egingo dute, gaur osteguna 16:00tatik 20:00etara, larunbatean 09:00tatik- 21:00etara, eta hurrengo asteartean eta ostegunean 17:00tatik 21:00etara. Laguntzaileak ere behar dituzte, “dena ondo antolatzeko eta dena txukun eramateko”.
Materialari dagokionez, hauxe da behar dutena: garbiketa produktuak (lixiba eta amoniakoa, kristalak garbitzekoa, detergentea), xaboiak, hortzetako pasta eta eskuilak, fregonak, erratzak, palak, kuboak, haraganak, karcherrak, eskularruak, maskarak, betaurrekoak, buzoak, uretako botak, zapatilak, gel hidroalkoholikoa, botikina, linterna normalak eta frontalak, zabor-poltsa handiak, altzariak, helduen eta haurtxoen pixoihalak, kontserbak, ura, sendagaiak, haurrentzako jostailuak, errotuladoreak, pinturak eta koadernoak
Gaztetxean ere, bilketa
Legazpiko Gaztetxean ere Valentziara bidaltzeko material bilketa egingo dute bihar ostirala, pintxo-pote eguna dela baliatuz. Kasu honetan, garbiketa produktuak, higienea produktua, produktu medikuak, janaria (kontserbak, ura eta animalien jana), arropa (garbiketa lanetan erabiltzeko), eta altzariak eta etxerako materiala bilduko dute, 20:00etatik 22:00etara.
Gainera, pintxo-poteko irabaziak Valentziako kaltetuentzat izango dira.
