Elkarlan baten emaitza Igartzan
Gipuzkoako Artisten Elkarteak erakusketa jarri du beste urte batez Beasainen, Bear pintura elkartearen bidez. Igartzako jauregian dago ikusgai, martxoaren 3ra arte.
Gipuzkoako Artisten erakusketa Beasaingo Igartzako jauregian.Bear elkartea Gipuzkoako Artisten Elkarteak pintura erakusketa jarri du ikusgai Beasaingo Igartzako jauregiko erakusketa aretoan. Aurreko ostiralean egin zuten inaugurazioa, eta martxoaren 3ra arte egongo dira Donostiako elkarte horretako kideen lanak aretoko paretetan zintzilik. Beasaingo Bear pintura elkartearekin egindako elkarlan baten emaitza da Beasainen egiten duten erakusketa hori.
Iban Aranburu margolari eta Bear elkarteko irakasleak azaldu duenez, duela hiru bat urte jarri zuten martxan ekimena. Beste gai batengatik harremanetan jarri ziren Gipuzkoako Artisten Elkartearekin, eta hartu-eman hartatik ondorioztatu zuten interesgarria litzatekeela elkarte horietako ikasleen lanak ikusgai jartzea bestearen herrian, truke kultural baten moduan. Hala, Beasainen urte hasieran egiten dute erakusketa, oraingoan otsailean, eta irailean Bear-eko ikasleen lanen erakusketa egingo dute Donostian, Gipuzkoako Artisten Elkarteak duen egoitzaren erakusketa aretoan.
Horrez gain, ekainean Bear pintura elkarteko ikasleen lanekin osatzen dute beste erakusketa bat beasaindarrek herrian bertan, urtean zehar landutakoa herrikideen aurrean aurkezteko.
Igartzako jauregian dagoen erakusketa 18:00etatik 20:00etara bisitatzeko aukera egongo da. 30-40 bat lan ikus daitezke, teknika ezberdinak erabilita sortuak.
‘Gerrarik ez’ marrazki lehiaketa
Beste hainbat egitasmo antolatzen ditu Bear elkarteak. Aurten, bigarren aldiz, udalaren laguntzarekin, haur eta gaztetxoen artean mural bat egiteko marrazki lehiaketa antolatu du, elkarteak jakinarazi duenez «umeen artean sormena eta irudimena bultzatzea» helburu. Aurtengo leloa Gerrarik ez izango da, eta muralean bertan agertu beharko da esaldi hori. 18 urtez azpiko goierritar guztiek parte hartu dezakete. Partaide bakoitzak mural edo grafiti bat egiteko ideiarekin marrazki original bat (kopiarik ez dute onartuko) egin beharko du, teknika librearekin, eta A4 tamainako formatuan aurkeztu beharko du.
Bi aukera eman dituzte proposamenak aurkezteko: posta bidalita Bear Elkartearen Gipuzkoa plazako Urbieta zentrora, marrazkiarekin batera beste paper batean ikaslearen izena, jaiotze data, helbidea eta guraso baten telefono zenbakia adierazita; edo posta elektronikoz bearelkartea@gmail.com helbidera marrazkia jpg formatuan atxikita eta aipatutako datuak idatzita.
Apirilaren 30era arte egongo da zabalik lanak aurkezteko epea.
