CAFek Intercity trenen «kontratu handia» lortu du Marokon
Esleipena "garrantzi handiko mugarria" dela nabarmendu du CAFek, Marokon lortutako lehen proiektua baita.
CAFek Marokoko ONCF enpresarentzat diseinatutako trenak. CAF Ekitaldi-hasiera iazko urtearen amaiera bezain positiboa ari da izaten CAFentzat. Izan ere, proiektu esanguratsuak lortu ditu, eta oraingoan, Marokon lortu duen garrantzi handiko kontratu berri baten esleipenaren berri eman du. Horri esker, gaur egun enpresak duen eskarien zorro handia sendotzea lortu du.
Marokoko trenbide-sareko operadore nazionalak, ONCF Office National des Chemins de Fer enpresak, CAF aukeratu du Marokoko trenbide-sarean zerbitzua emango duten 30 intercity tren moderno hornitzeko kontratuaren hornitzailea izan dadin. Kontratuak, gainera, etorkizunean kontratuaren irismena beste 10 unitaterekin handitzeko eta ONCFrentzat parkeko piezak hornitzeko eta laguntza teknikoa emateko zerbitzu-kontratua garatzeko aukerak jasotzen ditu.
Lehen kontratua Marokon
CAFentzat “garrantzi handiko mugarria” da, enpresak Marokon lortutako lehen proiektua baita. Bolumena 600 milioi euro ingurukoa izango da, etorkizunean ONCFk aktiba ditzakeen aukera posibleak kontuan hartu gabe, eta kontratua Espainiako Gobernuaren FEIM (Enpresa Nazioartekotzeko Funtsa) funtsen bidez finantzatuko da.
Proiektu honetarako CAFek diseinatutako unitateak “prestazio eta erosotasun maila goreneko intercity trenak” dira, eta 200 km/h-ko abiaduran operatzeko prestatuta daude. “Gainera, garraio-edukiera handia izango dute; izan ere, besteak beste, eserita joateko 500 plaza baino gehiago eta mugikortasun murriztuko pertsonentzako guneak izango dituzte”.
ONCFk aurrez ikusitakoaren arabera, hornitutako trenek Marokoko hiri nagusiak lotuz eskainiko dute zerbitzua, Fez-Marrakex eta Kenitra-Fez elkartzen dituzten lineen bidez. “Material ibilgarri berriak nabarmen hobetuko du herrialdeko tren-zerbitzuen kalitatea; izan ere, eskualde arteko konektagarritasuna hobetu eta bidaiarien garraio-edukierak handituko ditu”.
Trenbide sarearen garapenerako ere bai
Maroko bere azpiegiturak modernizatzeko eta hobetzeko helburu handiko planean barneratuta dago gaur egun, eta arreta berezia jarri du bere trenbide-sarean. “Hori dela eta, garapenean parte hartzeko CAF aukeratu izanak enpresak azken urteotan izandako ibilbideari egindako aitortza argia ekarri du berekin. Hala, enpresak helburu horiek lortzen lagunduko du bere esperientziari eta gaitasun teknologiari esker”.
Marokok 2030ean Espainiarekin eta Portugalekin batera antolatuko duen Munduko Futbol Txapelketaren testuinguruaren barruan bere trenbide-sarea berritzeko planarekin lotuta dago esleipena. “ONCFren helburuetako bat izango da herrialdeko trenbide-estalduraren tasa biztanleriaren %87ra arte handitzea 2040ari begira –gaur egun, tasa hori % 51koa da– Marokoko 40 hiri baino gehiago elkartuta. Gaur egun, trenbide-sareak Marokoko 23 hiri lotzen ditu.
